Риддер тұрғындары үйлерінің салқындап кеткеніне шағымданды

Кешелі бері Гагарин көшесіндегі көпқабатты үй тұрғындары батареялардың суықтығына шағымданып жатыр. Соған орай ШҚО әкімі Нұрымбет Сақтағанов Риддерге барып, тексеру жүргізді. 

- Аймақ басшысы жылу электр орталығы мен Гагарин көшесіндегі үйлердің біріне барып, жылумен жабдықтау жүйесінің жұмысын тексерді. Қазіргі таңда ЖЭО-да №2, 3, 4, 5 және 6 қазандықтар жұмыс істеп тұр, №1 қазандық резервте. Орталық штаттық режимде жұмыс істеп, қалаға жылу тұрақты түрде берілуде. Гагарин көшесіндегі тұрғын үйлерде жылу құбырлары мен батареялардың бітелгені анықталды, - деп хабарлады облыс әкімдігінен. 

Кейбір жағдайларда үйдің жылу тораптарындағы қысымды дұрыс реттеу қажеттігі байқалып отыр. 

- Үйге беріліп жатқан жылутасымалдағыштың температурасы жоғары, кері желіде де жылу бар. Анықталған барлық мәселе бойынша жауапты қызметтерге нақты тапсырмалар беріліп, олардың орындалуы облыс әкімінің жеке бақылауына алынды, - делінген ақпаратта. 

Еске салсақ, осыған дейін Риддерде өнеркәсіптік нысанда топырақтың ластануы мен заң бұзушылықтар анықталғаны хабарланған.