Өскеменде жылу құбырлары ауыстырылады

Өскеменде ескірген инженерлік желілер қатты аязға шыдас бермеді. Жылу құбырлары өткен ғасырдың 60-шы жылдары салынған.

Коммуналдық сала мамандары күшейтілген режимде жұмыс істеп, тәулік бойы жарылған құбырларды бүтіндеді. Мамандар тозған құбырды түгел ауыстырмай мәселе шешілмейді дейді. Сондықтан, биыл желілерді жаңғырту жұмыстары жалғасады. Оған жергілікті бюджет пен коммуналдық кәсіпорындар есебінен 6 млрд теңге бөлінеді.

Өскеменде салынғанына 60 жылдан асқан ескі құбырлар сарышұнақ аязға төтеп бере алмады. Салдарынан 2 мыңнан астам абонент тәулік бойы сусыз отырды. Коммуналдық кәсіпорын ұжымы 38 градус аязда белуардан су кешіп жарылған құбырларды бүтіндеді. Жұмысшылардың жанкешті еңбегінің арқасында су жүйесінің толық қатып қалуына жол берілмеді. 

Андрей Алехнович, «Өскемен - су арнасы» кәсіпорнының бас инженері:

- Өткен сенбі-жексенбі күндері екі бірдей апат болды. Қарбышев 28 және біз тұрған Целинная 2 мекенжайында диаметрі 300 мм-лік құбыр жарылды. Су желісінің жарылған бөлігі ауыстырылды. Апат орны толықтай қалыпқа келтірілді.

2025 жылы Өскемендегі су желісін жаңартуға 4 млрд теңге бөлінді. «Тарифті инвестицияға айырбастау» бағдарламасынан түскен қаржы да құбырлардың кем-кетігін жөндеуге жұмсалды. Нәтижесінде су құбырларының тозуы 59, ал, кәріз желісінде 79 пайызға дейін төмендеді. Қоғам белсендісі Алексей Божков инженерлік желілерді толық жаңғыртуға қомақты инвестиция қажет, - дейді.

Алексей Божков, қала тұрғыны:

- Тарифті инвестицияға айырбастау бағдарламасынан бөлек, тікелей инвестиция тарту керек. Бірінші кезекте магистральдық құбырларды, одан әрі электр желілерін де жаңарту қажет. Бұл салаға салған инвестиция түбінде өзін-өзі ақтап шығатыны сөзсіз.

Өскемен әкімдігі биыл су құбырларын жаңартуға 6 млрд теңгеден астам қаржы бөлінетінін айтады. Ол әрине қала қазынасынан және тарифтен түскен қаржының бір бөлігі.

Рашид Шерубаев, ТКШ, Жолаушылар көлігі және автомобиль жолдары бөлімі басшысының орынбасары:

- Тұрғын үй коммуналдық шаруашылығы бөлімі тарапынан бөлінетін қаржы мен кәсіпорынның инвестициялық табысы есебінен биыл 20 шақырымнан астам құбыр ауыстырылады.

Биыл жерасты су көзінен қалаға тіршілік нәрін жеткізетін құбыр мен шаһардың шеткері аудандарының орамішілік желілері де жаңартылады.

Авторлары: Елдос Кәкенов, Вячеслав Ветлугин және Дмитрий Пыхтин