Отшашу сұранысы ең жоғары тауарлардың бірі

Отшашу — Жаңа жыл мерекесі алдындағы ең сұранысы жоғары тауарлардың бірі. Бұл күндері елордадағы пиротехника сататын дүңгіршектер маңында ұзын-сонар кезек.

Астаналықтар бір жыл бойы атуға жететін отшашуды айналдырған 3-4 күнде сатып алып жатыр. Біздің тілшілер қала тұрғындарынан мерекелік фейерверкке қанша қаражат жұмсауға дайын екендерін білген еді. 

Пиротехника сататын дүңгіршектің алды ұзынсонар кезек. Астаналықтар отшашу алу үшін сағаттап күтуге дайын. Бағасының қымбаттығына да қарайтын емес. Қазақстандықтар жаңа жылдық дастарқанға қажет азық-түлік бағасының көтерілгеніне шағымданса да отшашуға кезектің азаяр түрі жоқ. Олардың бағасы бірнеше жүз мың теңгеге дейін жетеді. Соған қарамастан бірнеше отшашу алып жатқандар да бар. 

Измир, кәсіпкер:

- Отшашулардың құны 500 теңгеден басталып, 200 мың теңгеге дейін барады. Баға атылу саны, көлеміне қарай өзгереді. 

Елордада отшашу сататын 66 ресми сауда орыны бар. Бүгінде олардың тауарына сұраныс жоғары. Дегенмен қауіпсіздік талаптарын сақтау да керек. Сондықтан құтқарушылар сауда орындарында арнайы рейдтер жүргізеді. Осы уақытқа дейін екі жүзге жуық әкімшілік хаттама толтырылды.

Елдос Зияда, ҚР ТЖМ Өртке қарсы қызмет комитетінің бас маманы:

- Полиция қызметкерлерімен бірлесіп рейдке шығамыз. Заң бұзушылық анықталған жағдайда әкімшілік хаттама толтырылады. Пиротехникалық бұйымдарды дұрыс пайдаланбау және заңсыз сату деректері бойынша 180-нен астам хаттама түзілді. Рейдтер күн сайын, әсіресе жаңа жыл қарсаңында күшейтілген режимде жүргізіледі. 

Құтқарушылар барша қазақстандықтарды кез келген отшашу түрін, тіпті бенгаль оттарын қолданғанда барынша сақ болуға шақырады. «Өйткені қауіпсіздік бәрінен маңызды», - дейді олар.

Авторлары: Нұрқанат Қанапия, Галина Ахметова, Диас Қобланбаев