Өзбекстанда Іnno Week 2025 апталығы өтті

Ташкентте «InnoWeek–2025» халықаралық форумы өтті. Инновациялық идеялар апталығына әлемнің 30-дан астам елінен 250-ге тарта делегат қатысты.

Арасында қазақстандық өнертапқыштар да бар. Олар форум қатысушыларына тың технологияға бағытталған өнімдерін ұсынды.

Форумда негізінен экология, биомедицина, ауыл шаруашылығы технологиялары мен жасыл энергия саласындағы жобалар  таныстырылды. Солардың қатарында білім беру ісіндегі жаңашылдықтарды қамтитын Қазақстандық платформаның негізін қалаушы жастар да бар.

Нұрсұлтан Көбейсінов, жас өнертапқыш:

- Оқушыларға кәсіптік бағдар және психология бағытында, ал педагогтарға қағазбастылықты жоюға бағыттаған платформа. Оқушылар өздеріне жасанды интеллект арқылы түрлі кеңес ала алады. Ал мұғалімдер мектептерде болып жатқан трендтерді статистиканы жедел көре алады.

Тимур Дүрмағамбетов, стартап жетекшісі:

- Мақсатымыз жөндеу жұмыстарын қолжетімді ету әрі оңай жүзеге асуына жәрдемдесу. Жасанды интеллект көмегімен жоспар жасалып, смета құрылады. Біздің жобамыз жөндеу жұмыстарының кезең- кезеңімен, ашық түрде жүргізілуіне, алаяқтық фактілерді барынша азайтуға сеп болады.

Шараның басты ұраны – «Шекарасыз идеялар». Жастардың жаңалық ашуға ынтасы зор. Осыны байқаған кейбір бизнес өкілдерінің серіктес табатын кездері де тіркеліпті.

Асрор Норов, Өзбекстан Республикасы Инновациялық даму агенттігінің төрағасы:

- Алыс жақын шет елден 250-ге тарта қонақ келді. Ғалымдар, сарапшылар, инновациялық орталықтар мен ірі корпорация өкілдері бар. Ғылыми-өндірістік интеграцияны нығайту, тәжірибе алмасу, инновациялық шешімдерді тиімді пайдалану басты назарда.

Инновация тұрақты болашаққа бастайтын жол. Inno Week апталығында бас қосқан ғалымдар, кәсіпкерлер мен стартап жетекшілерінің ортақ тоқтамы осындай.