Павлодар облысында 34 млн теңгеге жөнделген көпір суға батып кетті

Фото: irbistv.kz

Көпір 2006 жылы орнатылған. Оны 4 ауылдың тұрғындары өзеннің арғы жағалауына өту үшін пайдаланады. Сол жерде мал азығы дайындалады. Сонымен қатар, жоғары кернеулі электр желілеріне қызмет көрсететін энергетикалық компания қызметкерлері де осы өткелді қолданады.

Астанада көпір үстінде ереже бұзған көлік жүргізушісі жазаланды

2024 жылы да көпірге қатысты мәселелер туындаған. Сол кезде шенеуніктер өткелді ауыстыруға арналған жобалық-сметалық құжаттаманы әзірлеуге қаржы бөлінгенін хабарлаған еді. Алайда 2026 жылдың көктемінде қиындықтар қайта пайда болған, дәнекерленген тігістер ажырап, понтон конструкциялары тозған. Кейін су тасқынынан соң көпір толықтай суға батып кеткен.

«Анықталған ақауларға байланысты ауылдық округ әкімдігі мердігер ұйымды кепілдік міндеттемелерін орындауға міндеттеу туралы сотқа талап арыз берді. Істі қарау нәтижесінде тараптар медиативтік келісімге келді. «Строй Эталон» ЖШС осы жылдың 25 шілдесіне дейін көпірді қалпына келтіру жұмыстарын жүргізуге міндеттенді», деп мәлімдеді Ақсу қаласы әкімдігі.

Көпірді қалпына келтіру жұмыстары кепілдік міндеттемелері жөніндегі шарт шеңберінде жүргізіледі.

Бұған дейін Түркістан облысында су деңгейі көтеріліп, екі көпірді су шайып кеткені айтылған еді.