Павлодар тұрғыны Дженнифер Лопестің концертіне алған билет ақшасын сот арқылы қайтарып алды

Павлодар облысы бойынша Сауда және тұтынушылардың құқықтарын қорғау департаментінің мәліметінше, ер адам концерт билетін туристік агенттік арқылы сатып алған. Алайда төлем жасағаннан кейін оған билет те, келісімшарт та, кассалық чек те берілмеген.

Кейін сатып алушы билетті қайтарып, ақшасын алуды сұраған. Бірақ оған билет құнының тек бір бөлігін ғана қайтаруға келісіп, шамамен 113 мың теңгені ұстап қалған.

Әлем чемпионаты: Сауд Арабиясы жанкүйерлеріне тегін билеттер тарата бастады

Алғашында сот сатушының пайдасына шешім шығарып, тек ақшаның бір бөлігін қайтаруды міндеттеген. Алайда сатып алушы бұл шешімге апелляциялық шағым түсірді.

Апелляциялық сот тараптар арасында ешқандай туристік қызмет көрсету туралы келісімшарт жасалмағанын, азаматтың жай ғана концертке билет сатып алғанын анықтады. Сонымен қатар сатушы билет құнының 30%-ын не себепті ұстап қалғанын дәлелдей алмады. Бұдан бөлек, мұндай ұсталым туралы сатып алушыға төлем жасалғаннан кейін ғана хабарланғаны белгілі болды.

Билет сатып аларда сақ болыңыз: Ішкі істер министрлігі азаматтарға ескерту жасады

Нәтижесінде сот сатушыны билет құнының толық сомасын – 376 869 теңгені қайтаруға, сондай-ақ сот шығындарын өтеуге міндеттеді.

Сауда және тұтынушылардың құқықтарын қорғау департаменті ел азаматтарына билет сатып алмас бұрын сатушы қайтару шарттарын толық түсіндіруге міндетті екенін еске салды. Сондай-ақ мамандар түбіртектерді, электрондық билеттерді және хат алмасуларды сақтап жүруге кеңес береді. Бұл құжаттар өз құқықтарыңызды қорғауға тура келген жағдайда дәлел ретінде қажет болуы мүмкін.

Дженнифер Лопестің концерті Астанаға 12 мың шетелдік турист әкелген