​Ақауы бар көлікті сатып алған азамат 19,6 млн теңгені сот арқылы қайтарып алды

Павлодар қаласының  азаматтық істер жөніндегі ауданаралық соты Павлодар облысының тұрғынының автокөлікті сатып алу-сату шартын бұзу және ақшалай қаражатты өндіру туралы ЖШС-ке қарсы талап арызын қанағаттандырды.

Талап қоюшы Павлодар облысының тұрғыны 2023 жылдың ақпан айында ЖШС-тен 19,6 миллион теңгеге "CHERY TIGGO 8 PRO MAX" маркалы көлік сатып алған болатын. Автокөлікке 84 ай немесе 200 мың шақырым жүріске кепілдік берілген. Сонымен қатар, көлік банк кепілінде болып, сақтандыру полисі де рәсімделген.

Алайда 2025 жылдың наурыз айында, кепілдік мерзімі аяқталмай жатып, көліктің қозғалтқышы істен шығады. Көлік ЖШС-нің қызмет көрсету орталығына тапсырылып, ұзақ уақыт бойы жөндеусіз қалады. Көлік иесі сатушы ЖШС-ке бірнеше рет шағымданғанымен, жөндеу жұмыстары толық аяқталмаған.

Осыған байланысты көлік иесі сотқа жүгініп, ЖШС-мен жасалған сату-сатып алу келісімін бұзуды, көліктің құнын, өсімпұлды, келтірілген залалды және моральдық шығынды өндіруді талап етті.

ЖШС өкілі талапты мойындамай, ақау кепілдік жағдайына жататынын, жөндеу шаралары қолға алынғанын, сондай-ақ уақытша пайдалануға басқа көлік берілгенін алға тартты.

Сот істі қарау барысында ақаудың кепілдік мерзімі ішінде пайда болғанын және көлік иесінің пайдалану ережелерін бұзғанын растайтын дәлелдер ЖШС тарапынан ұсынылмағанын атап өтті. Сонымен қатар, көліктің ұзақ уақыт бойы жарамсыз күйде болуы оның елеулі кемшілігі бар екенін дәлелденді.

Сот Азаматтық кодекс пен "Тұтынушылардың құқықтарын қорғау туралы" заң нормаларын басшылыққа ала отырып, көлік иесінің сату-сатып алу келісімін бұзу және төленген соманы қайтару туралы талаптарын заңды деп таныды.

Нәтижесінде, сот сату-сатып алу келісімін бұзып, ЖШС-тен көліктің құны ретінде 19,6 миллион теңге және моральдық зиянды өтеу үшін 150 мың теңге өндіріп алу туралы шешім шығарды.

Павлодар облыстық соты ЖШС мен банктің берген апелляциялық шағымдарын олардың қайтарып алынуына байланысты қараусыз қалдырды. Сот шешімі заңды күшіне енді.

Бүгін, 11:35