Павлодарда Ертіс арқылы өтетін жаңа көпірдің аралықтарын қыркүйек айында түйістіру жоспарланып отыр

Қазіргі уақытта көпірдің бірнеше тірегіне 276 метрлік аралық құрылымдар орнатылғанымен әзірше өзара жалғанбаған. Құрылысқа 288 адам мен 88 арнайы техника жұмылдырылған.

— Қыркүйек айында барлық аралық құрылымды түйістіруді жоспарлап отырмыз, одан кейін болат арқандарды тарту жұмыстары басталады. Сондай-ақ, әрбір аралық құрылымда биіктігі 20 метр болатын пилондар бар. Бұған қоса, аспалы (вантты) жүйе орнатылып, екі жағынан 10 болат арқаннан тартылады, — дейді «BI Group» компаниясының жол инфрақұрылымы дивизионының техникалық директоры Қанат Көшербаев.

Барлығы ойдағыдай болса, қазан айында көпірде асфальт төсеу және абаттандыру жұмыстары басталады. Атап айтқанда, жарық шамдары мен қоршаулар орнатылып, жаяу жүргіншілер жолы салынады.

Сонымен қатар, жаңа көпірді сәндік жарықпен безендіру де жоспарда бар. Ол үшін Philips компаниясына арнайы жоба тапсырылған. Жоба аясында көпірдің төменгі бөлігіне, аспалы арқандары мен қоршауларына динамикалық жарық жүйесін орнату қарастырылған.

Еске сала кетейік, биыл қыста Павлодарда салынып жатқан Ертіс өзені үстіндегі көпір өртенген еді. 

Сондай-ақ жаңа автокөпір жыл соңында пайдалануға берілуі мүмкін екенін жазғанбыз.