Педагогтерді аттестаттау жүйесінде не өзгереді

— Қолданыстағы аттестаттау тетіктері педагогтерге негізсіз артық жүктеме түсіріп отыр. Әсіресе тестілеуге дайындықтың көп уақыт алуы, портфолио қалыптастырудың күрделілігі және авторлық материалдардың практикалық маңызына қатысты сұрақтар мұғалімнің негізгі міндетіне — білім сапасына көңіл бөлуіне кедергі келтіреді, — деді вице-министр.

Осыған байланысты аттестаттау жүйесі оңтайландырылып, артық талаптар қысқартылады.

— Енді педагогтің кәсіби деңгейі тест нәтижесімен емес, оның күнделікті жұмысы мен білім беру сапасына қосқан нақты үлесі арқылы бағаланады, — деп нақтылады ол.

Вице-министрдің мәліметінше, өзгерістердің бірі — педагогтер үшін міндетті пәндік тестілеудің алынып тасталуы.

— Бұл талап тек педагогикалық қызметке жаңадан келген мамандарға, жұмысын қайта бастаған мұғалімдерге, сондай-ақ білім беру ұйымдарының басшылары мен әдіскерлеріне қатысты сақталады, — деді ол.

Сонымен қатар педагог кадрларды даярлау жүйесінде де өзгерістер бар.

— Жоғары оқу орындарына қабылдауда тест нәтижелерімен қатар арнайы емтихандарды қамтитын аралас бағалау моделіне көшу көзделіп отыр. Бұдан бөлек, педагогикалық мамандықтарға қойылатын талаптар күшейтіліп, шекті балл 75-ке дейін көтерілді, — деп толықтырды вице-министр.

Бұдан өзге, аттестаттау талаптары да жеңілдетілді.

— Енді эссе жазу, ғылыми мақала жариялау және авторлық бағдарламалар әзірлеу міндетті емес. Бұл мұғалім еңбегін қағазбастылықтан арылтып, нақты нәтижеге бағыттауға мүмкіндік береді, — деді ол.

Тағы бір маңызды өзгеріс — аттестаттау процесін толық цифрландыру.

— Барлық рәсім «Ұстаз» платформасы арқылы жүргізіледі. Бұл құжат айналымын қысқартып, процестің ашықтығы мен қолжетімділігін арттырады, — деп атап өтті Шынар Ақпарова.

Оның айтуынша, жаңа жүйе педагогтің кәсіби еркіндігін арттырып, оның шығармашылық және әдістемелік әлеуетін толық іске асыруға жағдай жасайды.

Сонымен қатар қолданыстағы тәртіпке сәйкес, белгіленген талаптарды орындаған педагогтерге тиісті біліктілік санаты бойынша қосымша ақы жаңа оқу жылының басынан бастап төленеді.

— Ал алғашқы тестілеуде шекті деңгейге жете алмаған педагогтерге қайта тапсыру мүмкіндігі беріледі, — деп түсіндірді вице-министр.

Жаңартылған аттестаттау моделі пилоттық режимде енгізіледі. Қазіргі уақытта тиісті құжат жобасы келісу сатысында. Алдағы уақытта педагогтерге кең көлемде түсіндіру жұмыстары жүргізіледі.

Бұған дейін Оқу-ағарту министрлігі педагогтерді аттестаттау жүйесіне өзгерістер енгізілетінін хабарлаған еді.