Польшаның танымал саябағындағы соқпақ жолда tourist бұғымен “төбелесіп қалды“

Польша Татраларында турист бұғының мүйізінен ұстап, онымен күреспек болған. Желіде қызу талқы тудырған оқиға туралы Tengri Travel хабарлайды.

Қоғамдық резонанс тудырған видео

Желіде Морские Око соқпағында түсірілген кадрлар пайда болды: онда туристің бұғымен жекпе-жекке шыққаны көрінеді.

Анықтама: Морские Око (Morskie Oko) соқпағы - Польша Татраларындағы ең танымал әрі көрікті жаяу жүру бағыттарының бірі, ол ең ірі тау көліне апарады.

Видеодан бұғының мүйізінен ұстауға тырысқан тағы бір туристі байқауға болады.

Жергілікті БАҚ-ты ақпаратынша, парктің күзет қызметі видеодағы адамдардың кім екенін анықтау үшін жарияланған кадрларды егжей-тегжейлі зерттеп жатыр. Қызметкерлер оқиғаның нақты қалай өрбігенін анықтауға көмектесетін куәгерлерді іздестіріп жатыр.

Ұлттық парк не деп ескертті?

TVP World хабарлауынша, Татра ұлттық паркі келушілерге бұғылар адамға үйренген болып көрінсе де, оларға жақындамауды, қол тигізбеуді және тамақ бермеуді ескертті.

Татра ұлттық паркі - Польшаның ең танымал табиғи парктерінің бірі. Ол елдің оңтүстігінде, Закопане қаласының маңында орналасқан. Парк өзінің тау пейзаждарымен және жабайы табиғатының алуан түрлілігімен танымал.

Қазан ортасында парктің Instagram-дағы ресми парақшасында келушілер үшін маңызды хабарлама жарияланды.

Мәліметке сәйкес, бұғыларды тек Татра ұлттық паркінің соқпақтарында ғана емес, Закопане көшелерінен де кездестіруге болады. Алайда қалада болсын, орманда немесе ұлттық парк аумағында болсын, белгілі бір ережелерді сақтамау жабайы жануармен кездесу кезінде қауіпті болуы мүмкін.

"Өкінішке қарай, ескертулерге қарамастан, кейбір адамдар жабайы жануарларға жақындап, оларды ұстауға, сипауға немесе жақыннан суретке түсуге тырысады. Бұл қауіпті. Бұғы адамдардың жанында жайбарақат тұрса да, ол бәрібір жабайы әрі болжап болмайтын жануар болып қала береді", - деп атап өтті ұлттық парк өкілдері.

Instagram-дағы бұл жарияланымды көру

Tatrzański Park Narodowy (@tatrzanskiparknarodowy) жарияланымы

Мамандар бірнеше ережені еске салды:

Жануарларға жақындамаңыз. Оларды ұстауға немесе ашуландыруға тырыспаңыз. Олардың еркін кетіп қалуы үшін жеткілікті орын қалдырыңыз. Балаларға абай болыңыз. Бұғымен суретке түсу үшін оларды қауіпке тікпеңіз және жабайы жануарларға жақындау қалыпты жағдай деген түсінікті қалыптастырмаңыз. Бұғыларды тамақтандырмаңыз. Қолдан тамақ ішуге үйренгендіктен, олар адамнан қаймығуды қояды және адамдардың жанынан тамақ іздеуге дағдыланады. Қоқыс тастамаңыз. Тамақ қалдықтары мен басқа да қоқыстар жабайы жануарларды өзіне тартады. Оларды жеу жануарлардың ауруға шалдығуына, тіпті өліміне әкеп соғуы мүмкін.

Бұдан бұрын парк әкімшілігі бұғының адамды көргенде қашпауы оған жақындауға болады дегенді білдірмейтінін баса айтқан болатын.

Тағы оқыңыз: Танымал әнші ұшақта әдепсіз жолаушыны сабасына түсірді

Бізді Google-дың негізгі дереккөздер тізіміне қосыңыз

Қосу