Премьер Оқу ағарту min гі мен әкімдіктерге 1 қарашаға дейін мерзім берді

Премьер-министр Олжас Бектенов Қазақстанда жұмысшы кадрларын даярлау жүйесін өзгерту бойынша бірқатар тапсырма берді, деп хабарлайды Tengrinews.kz тілшісі.

Үкімет отырысында премьер-министр қолданыстағы техникалық және кәсіптік білім беру жүйесі экономиканың қажеттіліктері мен технологиялық өзгерістерге жедел жауап беруі тиіс екенін мәлімдеді.

"Қазіргі жағдайда кез келген өндірістегі маман цифрлық басқару жүйелерімен кәсіби деңгейде жұмыс істей білуі және практикалық міндеттерді шешу үшін жаңа технологияларды, жасанды интеллект құралдарын қолдана алуы керек. Қолданыстағы кадр даярлау жүйесін дәл осы мақсаттарға бейімдеп қайта құру қажет", - деді Бектенов.

Министрлер кабинеті басшысының айтуынша, кейінгі жылдары мемлекет техникалық және кәсіптік білім беру саласын қаржыландыруды едәуір арттырды. Егер бұрын колледждерге бюджет есебінен жыл сайын 93 мыңға жуық студент қабылданса, биыл олардың саны 145 мыңға дейін өсті. Шәкіртақылар 50 пайызға көбейіп, бір студентті оқытуды қаржыландыру 2,2 есеге артты.

Алдағы үш жылда колледж студенттері үшін жатақханалардан 7,5 мыңға жуық жаңа орын ашу жоспарланып отыр.

"Бұл жоспар міндетті түрде орындалуы тиіс", - деп атап өтті Бектенов.

Сондай-ақ премьер-министр қаржыландыруды бөлу тәсілін өзгерту қажеттігін айтты. Мемлекеттік тапсырыс оқу орындарының мүмкіндіктеріне емес, экономикаға нақты қандай мамандар қажет екеніне байланысты болуы керек.

"Даярлауды қаржыландыру колледждердің мүмкіндіктерімен емес, экономиканың кадрларға деген расталған қажеттілігімен айқындалуы тиіс, сонымен қатар түлектердің жұмысқа орналасуына мониторинг жүргізілуі керек", - деді ол.

Бектенов инфрақұрылымның жай-күйіне де ерекше назар аударды. Оның айтуынша, жұмыс істеп тұрған техникалық және кәсіптік білім беру ұйымдарының 70 пайыздан астамы осыдан 40 жылдан астам уақыт бұрын салынған.

"Осыған байланысты Оқу-ағарту министрлігіне мүдделі мемлекеттік органдармен және өңір әкімдіктерімен бірлесіп, ағымдағы жылдың 1 қарашасына дейінгі мерзімде Үкіметке техникалық және кәсіптік білім берудің заманауи инфрақұрылымын дамытудың 2027–2030 жылдарға арналған бағдарламасын енгізуді тапсырамын", - деді Үкімет басшысы.

Сонымен қатар Олжас Бектенов әрбір өңірде экономиканың басым салалары бойынша кадрларды даярлау және тәуелсіз сертификаттаудың салалық кластерлерін құруды тапсырды. Еңбек, Оқу-ағарту және Ғылым министрліктері әкімдіктермен бірлесіп, кәсіпорындарға қандай мамандар және қанша мөлшерде қажет екенін жыл сайын анықтап отыруы тиіс. Бұл болжамдар тұрақты түрде жаңартылып, Enbek.kz платформасында орналастырылады.

Бұдан бөлек Үкімет басшысы Ғылым және Еңбек министрліктеріне осы жылдың соңына дейін Мамандықтарды трансформациялау ұлттық орталығын іске қосуды, онда жұмыс берушілердің жаңа мамандықтар мен сұранысқа ие құзыреттерді болжауға қатысуының нақты тетіктерін айқындауды тапсырды.

Бұған дейін Президент Қасым-Жомарт Тоқаев технологиялық өзгерістер мен экономиканың қажеттіліктерін ескере отырып, кадр даярлау жүйесін қайта құруды тапсырған болатын. Мемлекет басшысы жұмысшы мамандықтарын дамытуға және колледждердің кәсіпорындармен тығыз іс-қимыл жасауына ерекше көңіл бөлді.

Үкіметтің 2026 жылғы 8 қыркүйектегі отырысында Еңбек және халықты әлеуметтік қорғау министрі Асқарбек Ертаев 2035 жылға дейін Қазақстан экономикасына 2,9 миллион қызметкер қажет болатынын, оның 1,8 миллионы жұмысшы мамандықтары бойынша екенін хабарлады. Ең көп сұраныс өнеркәсіп, құрылыс, ауыл шаруашылығы және IT салаларында күтіледі.

Google News арқылы жаңалықтарымызды қадағалаңыз