Путин дзюдошы, Жапаров футболшы, Лукашенко хоккейші : Тоқаев әріптестерінің немен айналысатынын айтты

Мемлекет басшысы Қасым-Жомарт Тоқаев "Turkistan" газетіне берген сұхбатында ТМД елдері көшбасшыларының спортқа жақындығы туралы сұраққа жауап берді, деп хабарлайды Arasha.kz.

Президенттің айтуынша, жуырда Бішкекте өткен бейресми іс-шара барысында Владимир Путин жас дзюдошыға қарсы әдемі әдіс жасап, аға буынның абыройын асқақтатқан. Сондай-ақ Ильхам Алиевтің де спортқа жақын, үнемі жаттығатын кәнігі спортшыдай дайындықта жүретінін атап өтті.

Қасым-Жомарт Тоқаевтың сөзінше, Садыр Жапаров футбол ойнаса, Шавкат Мирзиёев жаттығу залында шынығып, ширақ жүреді. Ал Никол Пашинян велосипед тебуді әдетке айналдырған.

Сонымен қатар Александр Лукашенко әлі күнге дейін хоккей ойнайтынын, ал кезінде теңіз-әскери күштерінде қызмет етіп, жақсы шыныққан Эмомали Рахмонның да денсаулығы мықты екенін жеткізді.

"Бір сөзбен айтқанда, әріптестерімнің барлығы дерлік бабында", – деп түйіндеді Мемлекет басшысы.

Айта кетейік, Тоқаев экс-президент Нұрсұлтан Назарбаев пен Ресей басшысы Владимир Путин арасындағы кездесуге қатысты пікірін білдірген еді. Сондай-ақ президент денсаулығына қатысты айтылып жүрген әңгімелерге жауап берді.