“Қағаздарды айналдырып жүр“ Алматы ауруханасының дайын корпусы неліктен жарты жыл бойы емделушілерді қабылдамай жатыр

Әлеуметтік желілерде №4 қалалық клиникалық аурухананың реконструкцияланған корпусы төңірегінде қызу пікірталас басталды. Алматы тұрғынының айтуынша, жұмысқа дайын тұрған ғимарат бюрократиялық рәсімдердің кесірінен жарты жылдан аса уақыт бойы пациенттерді қабылдамай келеді. Tengrinews.kz әкімдіктен дайын аурухананың неге бос тұрғанын анықтады.

Әлеуметтік желілерде №4 қалалық клиникалық аурухананың реконструкцияланған корпусы төңірегінде қызу пікірталас басталды. Алматы тұрғынының айтуынша, жұмысқа дайын тұрған ғимарат бюрократиялық рәсімдердің кесірінен жарты жылдан аса уақыт бойы пациенттерді қабылдамай келеді. Tengrinews.kz әкімдіктен дайын аурухананың неге бос тұрғанын анықтады.

Қолданушының әлеуметтік желідегі жазбасы талқылауға себеп болған. Оның айтуынша, ол қоғамдық кеңес мүшелерімен мониторинг барысында ауруханаға барған.

"Миллиардтаған теңгеге ауқымды реконструкция жүргізілген ғимараттың бір бөлігі жарты жылдан аса уақыт бойы пайдалануға толық дайын тұр, бірақ әлі күнге дейін іске қосылмаған. Жыл басында бұл нысан Алматы әкіміне таныстырылған", – деп жазды ол.

Автордың сөзінше, корпуста жапондық рентген аппараттарын, смарт-операциялық бөлмелерді және автоматты жүйелерді қоса алғанда, заманауи медициналық жабдықтар орнатылып қойған.

"Пациенттер әлдеқашан жайлы жағдайда медициналық көмек алып, дәрігерлер әлемдік деңгейдегі жабдықтармен жұмыс істей алар еді. Бірақ оның орнына қымбат техника қоймада шаң басып жатыр, ал пациенттер тіпті реконструкция кезінде де қолданыста болған ескі үй-жайларда емделіп жүр. Себебі - шенеуніктердің бюрократиясы", – делінген жарияланымда.

Пост авторының пікірінше, нысанның іске қосылуы бірнеше мемлекеттік орган арасындағы келіспеушіліктерге байланысты кешігіп жатыр. Оның айтуынша, құрылыс басқармасы өз жұмысын аяқтаған, алайда нысанды әрі қарай өткізу процесі тоқтап қалған.

"Құрылыс басқармасы нысанды өткізді, денсаулық сақтау басқармасы оны тікелей қабылдай алмайды, ал мемлекеттік активтер басқармасы қабылдау актісіне бас дәрігердің қол қоюын талап етеді. Бұл ретте бас дәрігер нысанның тапсырыс берушісі емес және мұндай құжаттарға қол қоя алмайды. Нәтижесінде шенеуніктер жарты жыл бойы қағазбастылықпен айналысып, бір-біріне сілтеумен келеді, ал қала тұрғындары әлдеқашан салынған әрі жұмысқа дайын нысанның игілігін көре алмай отыр", – деп жазды ол.

Қорытындылай келе, қолданушы қала басшылығы бұл жағдайдан хабардар ма деген сауал тастады.

Алматы әкімдігі аурухананы реконструкциялау жұмыстары толық аяқталғанын және нысанның пайдалануға берілгенін хабарлады.

"Нысанды реконструкциялау жұмыстары толық көлемде аяқталды. 2025 жылғы 29 желтоқсанда нысан заңнамада белгіленген тәртіппен пайдалануға берілді, медициналық жабдықтар жеткізілді және қолдануға дайын", – деп хабарлады ведомство.

Қала билігі мамандар қазіргі уақытта нысан мен жабдықтарды пайдаланушы ұйымның теңгеріміне өткізумен айналысып жатқанын түсіндірді.

"Құрылыс басқармасы барлық мүдделі тараппен бірлесіп, нысанды штаттық режимде пайдалануды бастау үшін қабылдау-өткізу рәсімдерін тезірек аяқтау бойынша жұмыс жүргізіп жатыр", – деді әкімдіктегілер.

ЧИТАЙТЕ ТАКЖЕ

Жұмбақ жағдайда жоғалған шатыр және ұзаққа созылған сот: Алматының қақ ортасындағы аурухана неге қаңырап қалды?

Google News арқылы жаңалықтарымызды қадағалаңыз

Денсаулық