Қайрат Чемпиондар лигасында Пафоспен ойнайды

Бүгін алматылық “Қайрат” чемпиондар лигасындағы үш ойынын өткізеді. Қарсылас кипрлық “Пафос”. Олар әзірге үздік 36 команданың арасынан бір ұпаймен 32-орында келе жатыр.

Ернұр Дүйсенғазы, спорт журналисі:

- Пафос командасы чемпиондар лигасындағы алғашқы жорығында “Олимпиакоспен” 0:0 тең ойнаған команда. Сол себепті бұл ұжымның қауқары “Қайратқа” толыққанды жетеді деп ойлаймын. Енді алматылық жігіттер “Реалдан” кейін қолды бос жіберген жоқ. Команда 2 жақтан яғни Қазақстан премьер-лигасы мен чемпиондар лигасына назар салып ойнайды. Енді өгіз өлмейтін, арба сынбайтын әрекет жасауға тырысады деп ойлаймын Уразбахтиннің ойыншылары.      

Қайрат екі турдың қорытындысы бойынша 0 ұпаймен ең соңғы орында. Алматылық ұжым осыған дейін Лиссабондық “Спортингтен” 4:1, әйгілік “Реал Мадридтен” 5:0 есебімен ұтылған еді. Әзірге 6 ұпаймен “Бавария”, “Реал”, “ПСЖ” секілді атақты кубтар көш бастап тұр.      

Ербол Қайыров  сарапшы:

- Екі жеңілістен “Қайрат” үш ұпай алуға тырысады. Былай кипрлық ұжымды мықты деп айта алмаймыз. Жақында ғана құрылған клуб. Сондықтан “Қайрат” фаворит. Олар Орталық стадионда ойнайды. Жоржиньо, Сәтбаев, Тапалов, Мрынский сияқты ойыншылар өте мықты, бабында. Жарақаттары жоқ. Сондықтан менің ойымша, “Қайрат” 2:1 есебімен жеңіске жетеді. 

Айтпақшы “Қайрат” чемпиондар лигасында көш бастамаса да, билет бағасы бойынша бірінші орында тұр. Мәселен матчты тамашалау үшін қалтаңызда ең кемі 30 мыңнан 250 мың теңгеге дейін ақшаңыз болу керек. Жанкүйерлердің көбі байкот жариялап жатыр. Сәйкесінше стадион бос болуы мүмкін. Ал Атлетико Мадридтің стадионына кіру 200 мың болса, корольдік клубтың ойынын 160 мың теңгеге тамашалауға болады. Арсенал мен Интердегі ең қымбат билет 100 мың теңгені құраса, Бавария 75 мың, Челси 60 мың, Ливерпуль 50 мың теңге сұрайды.

Ербол Қайыров, сарапшы:

- Менің ойымша, билеттердің 500 теңгеден 10 мың теңгеге дейін сатуға болатын еді. Себебі ол Реал емес, Челси, МЮ емес сондықтан арзан бағада сатуға болады. Өте қымбат. Иә, түсініп тұрмын. Чемпиондар лигасының ойыны. Дегенмен халық арасында ондай қызығушылық жоқ.   

Ернұр Дүйсенғазы, спорт журналисі:

- Осы күнге дейін билеттердің бағасы өзгеретін шығар деп күттік. Бірақ ешқандай ақпарат көздерін оқыған жоқпыз билеттердің бағасы түскен жоқ немесе жеңілдіктер бар деген секілді...Енді ол жерде көрермен болмаса Қайрат өзінің ойынын толық аша алмауы да мүмкін. Стадион бос болуы мүмкін. Стадион бос болса атмосфера жоқ болады. Енді футболды, жанкүйерсіз, атмосфера елестету мүмкін емес.   

Еске сала кетейік, матч бүгін Астана уақытымен 21:45 те басталады. Ойынды отандық арналар тікелей эфирде көрсетеді. 

Авторлары: Мерей Қанапия, Руслан Әлиев