Қапшағайда балықшылар тосын “жайтқа” тап болды

Қапшағай су қоймасында әдетте қыста жылы жаққа кететін бірқазандар байқалды. Tengritravel.kz тілшісі бірқазандардың қыста қалай күн көретінін және адамдарға қауіпті-қатер төндірмейтінін анықтап білді.

Қапшағай су қоймасында әдетте қыста жылы жаққа кететін бірқазандар байқалды. Tengritravel.kz тілшісі бірқазандардың қыста қалай күн көретінін және адамдарға қауіпті-қатер төндірмейтінін анықтап білді.

Мұндай ерекше "жайт" Қонаевта түсіріліп, әлеуметтік желілерде жарияланған. Видеода құстар адамдардың қасында жүріп, балықтан өз үлесін күткендей айналсоқтайды.

Қонаев қаласы әкімдігі биыл бірқазандар шынында да су айдынынан жылы жаққа ұшпағанын растады. Жергілікті биліктің айтуынша, құстар адамға қауіп төндірмейді. Бірақ оларға адам әрекеті зиян келтіруі мүмкін: тасталған қоқыс, аулау, ұя маңына тым жақындау, шу көтеру. Дегенмен балықшылар құстарды қоректендіріп жүргенін ескерсек, адамдар мен бірқазандар үйреніп келе жатыр деуге болады.

Орнитолог, биология ғылымдарының кандидаты Сергей Скляренко құстардың жағдайына қатысты пікір білдірді. Маман бірқазандардың қыстап қалуынан гөрі, биыл әдеттегіден ертерек ұшып келуі ықтимал екенін айтады: бұл құстар күнтізбеге емес, ауа райына және ашық суға қарай қозғалады.

"Бірқазандар әдетте қыстауға Үндістанға қарай кетеді. Олардың бір бөлігі жолай мұз қатпайтын су қоймаларында қалып қояды. Бірақ мұз үстінде өте сирек жүреді. Бұл жағдайда, шамасы, ерте келіп қалған. Кішкене жаңылысып кеткен сияқты", – деп түсіндірді ол.

Сондай-ақ, бірқазандар алысқа үздіксіз көшетін құстардың қатарына жатпайды, көбіне ауа райына қарай "жағдайға сай" орын ауыстырып отырады.

Орнитолог бірқазандардың адамға қауіпсіз екенін де атап өтті: бұлар агрессиясы жоқ құстар, қауіпті ауру таратпайды, қорегі – балық.

"Әрине, үлкен құс болған соң, оны қолмен ұстамақ болсаңыз, шоқып жіберуі мүмкін. Бірақ жалпы алғанда – жуас құс, жаппай ауру таратпайды", – деді маман.

Балықпен қоректендіру де, құсқа зиян емес. Бірқазан өзіне жарамсыз асты жемейді:

"Адамдар балық беріп жатса, қауіп жоқ. Ең бастысы – балықтың балғын болуы. Мысалы, бірқазан нан жемейді", – деп нақтылады ол.

Саяхат қызықтары мен пайдалы ақпаратты Instagram және Facebook парақшаларынан оқи аласыз!