Қарағанды облысындағы бір жасар тайған иті елдегі ең үздік тұқым өкілі деп танылды

Қарағанды облысының Осакаров ауданында өсірілген бір жасар Нұрсұлтан есімді тайған иті Қазақстандағы өз тұқымының ең танымал әрі ең көп марапатқа ие өкілі атанды. Бар болғаны бір жыл ішінде ол Қазақстан, Ресей, Қырғызстан және Өзбекстанда өткен көрмелерде, сондай-ақ ТМД елдерінің халықаралық байқауларында чемпион атақтарына қол жеткізді.

Нұрсұлтанның иесі – Окольное ауылының тұрғыны, Қарағанды орман және жануарлар дүниесін қорғау шаруашылығында орманшы болып қызмет ететін Сергей Долголаптев. Ол жұбайы Викториямен бірге көп жылдан бері аңшылық иттерді өсірумен айналысады. Негізінен тазы тұқымын баптайтын Сергей өткен жылы Қырғызстаннан тайған тұқымды күшікті алып келген. Қырғыз жерінде бұл тұқым ұлттық мұра ретінде ерекше құрметке ие.

Қырғыз тазысы, яғни тайған – ежелден келе жатқан аңшылық ит тұқымы. Ол күш-қайратымен, төзімділігімен және иесіне деген айрықша адалдығымен ерекшеленеді. Бұрын мұндай иттерді Қырғызстан аумағынан шығаруға тыйым салынған, ал күшіктер тек құрметті қонақтарға сый ретінде берілетін.

Күшікке Нұрсұлтан деген ат беріліп, арнайы көрмелерге жүйелі түрде дайындала бастады. Оның алғашқы жарысы 2025 жылдың ақпанында Қарағандыда өтті. Сол сәттен бастап ол көрме сарапшыларының жоғары бағасына ие болды. Тамыз айында Нұрсұлтан «Қазақстанның жас чемпионы» атағын жеңіп алып, артынша Қорған қаласындағы халықаралық көрмеде «Федерация чемпионы» және «Ресейдің жас чемпионы» атанды. Қыркүйекте Қырғызстанда өткен байқауда ол «Қырғызстан чемпионы» және «ТМД жеңімпазы» атанса, Ташкенттегі көрмеде «Өзбекстанның жас чемпионы» және тағы да «ТМД жеңімпазы» атақтарына ие болды. Ал Астанада өткен ұлттық деңгейдегі байқауда Нұрсұлтан «Тұқымның үздік өкілі» деп танылды.

Осылайша, Нұрсұлтан бүгінде Қазақстандағы тайған тұқымының ең атақты және ең жоғары марапатқа ие өкілі атанып отыр. Оның жетістіктеріне Қырғызстанның кинолог мамандары да қызығушылық танытып, итті тұқымды сақтау мен қалпына келтіру бағдарламаларына енгізу мүмкіндігін қарастыруда. Сарапшылардың пікірінше, Нұрсұлтан классикалық тұқымдық белгілерді мінсіз сақтаған ерекше үлгі.

Сергей Долголаптев тайған тұқымының тазалығын сақтау мен итке лайықты күтім жасаудың маңызын терең түсінеді.

– Біздің итімізге шетелдік әріптестердің қызығушылығы зор. Өйткені ол тайған тұқымының барлық классикалық қасиеттерін айқын көрсетеді. Біз өзімізге артылған жауапкершілікті сезініп, итіміздің дұрыс күтімі мен тәрбиесіне бар күшімізді жұмсаймыз, – дейді Нұрсұлтанның иесі Сергей Долголаптев.

Бүгін, 11:26