Қарағанды қарғын суға дайын ба?

Биыл қар еруін күткен төтеншеліктер ақпан айында «Көктем-2026» республикалық командалық-штабтық оқу-жаттығуын өткізді. Осы оқу аясында су тасқыны кезеңіндегі төтенше жағдайларға ден қойып, дайындық пысықталғаны айтылды. Бір мезгілде Абай ауданының Самар ауылдық округіне қарасты «Огороды» бөлімшесінде қорғаныс бөгетін нығайту бойынша практикалық жұмыстар жүргізілді.    

Су басу қаупі бар аймақтардан халықты эвакуациялау ұйымдастырылып, зардап шеккен тұрғындарды қабылдау пункті ашылып қойған. Пунктте азаматтарды тіркеу, тамақтандыруды ұйымдастыру, медициналық тексеру және алғашқы көмек көрсету қамтамасыз етілмек.

Негізі, қазір Қарағанды облысында жағдай тұрақты, өзендердің мұз еруі бақылауда. «Қазгидромет» мәліметі бойынша, облыс аумағының шамамен 45%-ын қар басып жатыр.

– Қазір Қарағанды облыстық Төтенше жағдай департаменті әскери бөлімдерінің біріккен күштері Нұра, Қарқаралы және Осакаров аудандарында қап төсеу, арықтарды тазалау және қорғаныс бөгеттерін нығайту бойынша алдын алу шараларын жүргізуде. Бұқар жырау ауданындағы Нұра өзенінде мұз кептелістерінің алдын алу мақсатында мұзды ұсақтау жұмыстары жүргізілді. Жалпы, Қарағанды облысы бойынша су тасқынына қарсы іс-шаралар жалғасуда және бақылауда. Қарағанды облысында тұрғындарды өз аулаларындағы қарды тазалауға шақырды. Қардың еруі басталғандықтан, су басу қаупі артып отыр, сондықтан аула аумақтарын дер кезінде тазалау  маңызды, – дейді Қарағанды облысы Төтенше жағдайлар департаментінің басшысы Марғұлан Аманбаев.

Сонымен қатар қала және аудан әкімдері халыққа қар тазалауды кейінге қалдырмауға шақырып, үндеу жасады. Қазір коммуналдық қызметтер көшелер мен қоғамдық орындарды тазалап жатыр, алайда аулалар тұрғындардың өз жауапкершілігінде.

«Қардың белсенді еру кезеңі басталды. Қазір көп нәрсе тек коммуналдық қыз­меттерге ғана емес, өзімізге де байланысты. Барлық тұрғынды аулаларын қардан тазалауға шақырамыз. Коммуналдық қызметтер көшелерді тазалауға жұмылдырылған. Жағдай тұрақты бақылауда және мониторинг жүргізілуде», – делінген үндеуде.

Кейінгі деректерге сенсек, елді мекен­дерден 1,8 миллион текше метрден астам қар шығарылған. Сонымен қатар су өткізу құбырлары, арналар мен арықтар тазартылып, қорғаныс бөгеттері нығайтылуда. Өзендерде мұз кептелістерінің алдын алу үшін жарылыс жұмыстары жүргізілуде.

Бұған дейін облыс әкімі Ермағанбет Бөлекпаев Бұқар жырау, Нұра және Осакаров аудандарындағы су тасқыны қаупі бар ауылдарды аралап шықты. Жергілікті жерлерде әкімдер мен ТЖД өкілдері бірлесіп, аумақтарды тұрақты түрде бақылауда ұстап отыр.

«Құтқарушылар су айдындарын аралап, жадынамалар таратып, балықшылармен және тұрғындармен түсіндіру жұмыстарын жүргізуде. Қарағанды облысының Төтенше жағдайлар департаменті су айдындарындағы қауіпсіздік ережелерін бұзғаны немесе орындамағаны үшін ҚР ӘҚБтК-нің 412-бабына сәйкес, әкімшілік жауапкершілік қарастырылғанын ескертеді»,  – дейді Марғұлан Топашұлы.

Осылайша, өңір әзірге сақтық шарасымен шектеліп отыр. Қар толық еріп бітпейінше, төтенше жағдайдың болар-болмасын тап басып айту қиын көрінеді.

Әдебиет БЕЛГІБАЙҰЛЫ,

Қарағанды облысы