Қарағандыда жаңа әлеуметтік жоба іске қосылды

Енді көп қабатты үйде тұратын арбаға таңылған адамдар дәлізбен көтерілі түсуге көмектесетін қызмет түріне, тегін тапсырыс бере алады.

Ол үшін жергілікті бюджеттен ақша бөлініп, арнайы көтергіш құрылғылар сатып алынған. Өңірде мүгедектігі бар адамдарды қолдау мақсатында осындай бірқатар әлеуметтік маңызды жобалар жүзеге асырылып жатыр. 

Руслан Нұрланұлы, тілші:

- Қаладағы ескі тұрғын үйлерде жеделсаты мен пандустың болмауы ерекше жандар үшін ең өзекті мәселелердің бірі. Көбінде мүгедектігі бар адамдар таза ауа жұтуға далаға шыға алмайды, жақын маңдағы дүкенге бара алмайды. Сондықтан мұндай әлеуметтік қызмет түрі оларға үлкен қолдау. 

Аружан Жеңіс енді арнайы көтергіш құрылғының көмегімен екінші қабатқа оңай шығып жүр. Ол үшін алдын ала тапсырыс беріліп, арбаға бекітілетін механизімді алып арнайы көмекшілер келеді. Бұрын ата-анасы қызды көтеріп жүретін. Үйірмеге, жаттығуға кешігіп қалған кездер де болыпты. Аружан бочча спортын кәсіби түрде меңгерген. Халықаралық, республикалық жарыстардың жүлдегері.

Ұлжан Әбдікәрімова, анасы:

- Біздерге үлкен көмек. Бұл 19-да неше жыл көтеріп-түсіріп жүрдік қой. Өте жақсы жоба. Қазір негізі көп жағдай жасалып жатыр ғой. Мекемелердің көбісінде пандустар, электр көтергіштер істеп қойған. 

Әлеуметтік жоба мемлекеттік тапсырыс бойынша жүзеге асырылды. Биыл оған қала бюджетінен 16 миллион теңге бөлінді. Бұл қызмет түріне сұраныс жоғары. Алдағы уақытта мұндай көтергіш құрылғылар өңірдің барлық қала, аудандарына да сатып алынады.

Бақытнұр Талипова, Қарағанды қаласы жұмыспен қамту және әб бөлімі басшысының орынбасары:

- Жаңа осы әлеуметтік жобаны енгізген болатынбыз. Бүгінгі күнде 50-ден астам адам бұл қызметті алып жатыр. Бұл енді инватакси қызметімен тығыз байланысты деп айтуға болады. Яғни инватаксиге тапсырыс бергенде осы жеделсаты қызметіне де тапсырыс бере алады. 

Көтергіштерден бөлек, мүгедектігі бар жандар қаланың кез келген жеріне жеткізетін инватаксиді пайдалана алады. Қарағандыда мұндай көліктердің саны қазір 130-ға жетті. Сондай-ақ мемлекеттік тапсырыс бойынша ашылған шеберханада арбаларын тегін жөндеп береді. Өңірде ерекше жандарды түрлі мамандықтар бойынша оқытатын инклюзивті орталықтар, спорттық-сауықтыру орындары жұмыс істейді. Облыста 50 мыңнан астам мүгедектігі бар жан тұрады.

Руслан Нұрланұлы, Сайран Ақамбаев, Аман Хамит