Қарағандыда жаңа жоба іске қосылды

Қарағандыда «Заң және тәртіп» қағидасы шеңберінде жаңа әлеуметтік-маңызды бастама – «Құқықтық тәртіп әліппесі» жобасы іске қосылды. Жоба халықтың құқықтық сауаттылығы мен құқық қорғау органдарына деген сенімін арттыруды, сондай-ақ құқықтық мәдениетті қалыптастыруды мақсат етеді. 

Жоба «Ашық есік күні» аясында таныстырылды. Шараға мәслихат депутаттары, қоғам белсенділері, жоғары оқу орындарының студенттері қатысты. Қатысушылар полиция қызметінің жұмысымен жан-жақты танысып, өздері үшін маңызды сауалдарға жауап алды. Олар кәмелетке толмағандар ісі жөніндегі полиция, көші-қон қызметі, жедел басқару орталығы, арнайы жасақ сынды 11 бөлімнің бір күндік жұмысына куә болды.

Шара соңында қатысушылар еңбек және жауынгерлік даңқ музейіне барды. Полицейлердің айтуынша, қазіргі құқық қорғау жүйесінің негізгі міндеті — заманауи, жедел сервистік полиция моделін қалыптастыру, сонымен бірге оның ашықтығы мен қоғаммен тығыз байланысын күшейту.

Жасқайрат Қайыров, ПД бастығының міндетін атқарушы:

- Адамдарды бірқатар топқа бөлдік. Бір топ учаскелік полициямен барып жұмыс істейді, есепте тұрған тұлғалармен, есепте тұрған отбасылармен жұмыс істейді. Бір топ ювеналдық полициямен бірігіп мектептерді аралап, лекцияларды тыңдап, сол жұмыстарды тек қана көрмей, өздері де соны істейді.