Қараусыз жүрген мал иелеріне жауапкершілік күшейтіледі

ҚР Ауыл шаруашылығы вице-министрі Азат Сұлтановтың айтуынша, малдың кімге тиесілі екенін анықтау үшін сырға немесе чип салу мәселесі көтеріліп отыр. Сондай-ақ бұл іс-шаралар мал ұрлығының алдын алу мақсатында да жасалып жатыр.

- Қазір мал құлағына сырға тағу немесе чип салдыруда ешқандай проблема жоқ. Бұған дейін сырға алуға қатысты конкурс рәсімдері Ауыл шаруашылығы министрлігінің құзырында болған. Өткен жылдан осы қызметтерді жергілікті атқарушы органдарға бердік, қаражатпен толық қамтамасыз етілді, - деді А. Сұлтанов Парламент Мәжілісінде тілшілер сұрағына жауап бере отырып.

Оның айтуынша, қазір ауылдарда тіркелмеген мал әлі де бар. Сондықтан заңнама аясында малға сырға мен чипті тағуды міндеттейтін өзгеріс енгізіліп жатыр.

- Ереже бойынша тіркеу үшін сырға мен чипті алуы керек. Қазір тиісті заңнамаға өзгеріс енгізіп жатырмыз. Оның мақсаты – жауапкершілікті енгізу. Мәселен, жайылып жүрген малдың автожолға шығуы салдарынан жол-көлік оқиғалары болып жатыр. Тиісті ұсынылған норма қабылданса, мал иелеріне жауапкершілік болады, - деді вице-министр.

Бұған дейін соңғы жылдары қараусыз малдың кесірінен жол апаты жиі тіркеліп, қайғылы оқиғалар азаймай тұрғанын жазған едік.