“Қатты уайымдаған едім...”: Роза Рымбаева концертінің алдында көрерменге алғыс айтты (видео)

Роза Рымбаеваның Алматыда өтетін мерейтойлық концертіне билет толық сатылды, – деп жазды Aikyn.kz.

Халық әртісінің ұлы Әли Оқапов әлеуметтік желіде видео жариялап, анасына қуанышты хабарды жеткізді. Мұны естіген Роза Рымбаева көрерменге алғыс айтты. Сонымен қатар осы концертті қатты уайымдағанын жасырмады.

«Шынымды айтсам, қатты уайымдадым. Қазір формат басқа, жаңа жұлдыздар, трендтер бар. Олар сәнді, олар өнердің ортасында жүр», – дейді әнші.

Халық әртісі жанкүйерлерінің өтінішімен қосымша концерт ұйымдастырылуы мүмкін екенін айтты.

«Тағы бір концерт берермін деп ойланып жатырмын. Бірақ бәрі сіздерге байланысты, қымбатты көрерменім. Егер қолдау білдіріп, тағы келгіңіз келсе, екінші концерт ұйымдастыруға болады», – деді әнші.

Айта кетейік, 7 ақпанда Алматыдағы Республика сарайында Халық әртісі Роза Рымбаеваның мерейтойлық концерті өтеді. Әнші сахнада жүргеніне 50 жыл толғанына орай көрерменмен қауышпақ.

Сараптама, зерттеу мақала, күнделікті өзекті ақпаратты «Айқынның»   TELEGRAM  арнасынан табасыз.