Қауіпті ескермеген қатерге ұрынады

Облыстық Төтенше жағдайлар департаменті бастығының орынбасары Ералы Ақылбековтің айтуынша, су айдындарындағы қауіпсіздікті қамтамасыз ету және қайғылы оқиғалардың алдын алу мақсатында кешенді профилактикалық жұмыстар қолға алыныпты.

– Бүгінде облыс аумағында шомылуға рұқсат етілген 12 орын белгіленген. Бұл аумақтарда тәулік бойы 6 стационарлық және 6 мобильді құтқару жасағы кезекшілік етеді. Қауіпсіздікті қамтамасыз етуге 21 құт­қарушы, 8 жүзу құралы мен 8 арнайы техника жұмыл­дырылған.Шомылу орындарында қызмет атқаратын 12 құтқарушы алғашқы медициналық көмек көрсету және суда құтқару бойынша 40 сағаттық арнайы даярлықтан өткен. 16-19 маусым аралығында облыстағы 7 жазғы сауықтыру лагерінде кешенді профи­лактикалық іс-шаралар ұйымдастырылып, 2 400 оқушы қамтылды. Бұл бағыттағы жұмыстар жалғасуда, – дейді Ералы Ақылбеков. 

Шомылу маусымы басталғалы Төтенше жағдайлар департаменті, полиция және жергілікті атқарушы органдар бірлесіп 621 рейд өткізіп отыр. Нәтижесінде, Қазақстан Республикасының Әкімшілік құқық бұзушылық туралы кодексінің 364, 412, 440 және 582-бап­тарына сәйкес, 704 азамат әкімшілік жауап­кершілікке тартылған.

Абырой болғанда, биыл қайғылы оқиға тіркелген жоқ. Алайда апат айтып келмейтіні белгілі. Сондықтан қай кезде де сауысқандай сақ болған жөн. Әсіресе, бассейндерге бақылау жұмыстарын күшейткен абзал. Өйткені көптеген бассейндерде қарапайым қауіпсіздік шаралары сақтала бермейді. 

Төтенше жағдайлар қызметінің мамандары бассейнде демалушылардың қарапайым қауіпсіздік қағидаларын сақтауы аса маңызды екенін айтады. Ең алдымен, балаларды бір сәтке де қараусыз қалдыруға болмайды. Көптеген жазатайым оқиға бірнеше минуттың ішінде болатындықтан, ата-ананың қырағылығы – баланың қауіпсіздігінің басты кепілі.

– Бассейнге түсер алдында міндетті түрде душ қабылдап, арнайы жүзу киімін пайдалану қажет. Тереңдігі белгісіз жерге секіруге, бассейн жиегінде жүгіріп ойнауға, бір-бірін итеруге немесе әзілдеп суға батыруға болмайды. Мұндай әрекеттер ауыр жарақатқа немесе суға кету қаупіне әкелуі мүмкін.

Сондай-ақ  алкогольдік ішімдік ішкен немесе өзін жайсыз сезінген адамдардың суға түсуіне болмайды. Егер суда жүрген кезде бас айналу, аяқ-қолдың тартылуы немесе әлсіздік байқалса, бірден судан шығып, бассейн қызметкерлеріне хабарлау қажет. Ал жүрек-қан тамыр аурулары бар азаматтарға дәрігердің кеңесінсіз ұзақ уақыт суда болмаған жөн, – дейді құтқарушы Әлібек Ардақұлы.

– Жыл сайын жазғы демалыс қарсаңында түсіндіру жұмыстары күшейтіледі. Себебі статистикаға сәйкес, жазғы маусымда су айдын­дарында демалушылардың шамамен 90 пайызын оқушылар мен жасөспірімдер құрайды. Осыған байланысты биыл Тараз қаласы Төтенше жағдайлар басқармасы мен білім бөлімінің ұйымдастыруымен  судағы қауіпсіздік тақыры­бында интерактивті сабақтар өткізілді. Іс-шара барысында төтенше жағдайлар қызметкерлері мен білім бөлімінің әдіскерлері оқушылар мен педагогтарға қауіпсіздік ережелерін түсіндірді. Кездесуге мектептің 150 оқушысы мен мұғалімдері оффлайн қатысса, қала мектептерінен 2450-ге жуық оқушы онлайн форматта қамтылды. Сонымен қатар мектеп жанындағы лагерьлер ашылғаннан бері қаладағы 40 мектеп лагерінде судағы қауіпсіздік бойынша түсіндіру сабақтары ұйымдастырылды.

Қауіптің алдын алу мақсатында биылғы 1 мамырдан бастап қаладағы су айдындарында күн сайын рейдтік-профилактикалық жұмыстар жүргізілуде. Су айдындарының 11 учаскесіне 25 дана «Суға түсуге тыйым салынады» деген ескерту тақтайшалары орнатылған. Сонымен бірге бекітілген кестеге сәйкес, төтенше жағ­дай­лар басқармасының қызметкерлері күн­де­лікті рейдке шығып, Жедел құтқару жасағы арнайы техникамен тұрақты кезекшілік атқаруда. Бұдан бөлек, қала көшелеріндегі LED экрандарда қауіпсіздік роликтері көр­сетіліп, халық көп жиналатын орындарға 6 ескерту баннері орналастырылған, – дейді Тараз қаласы Төтенше жағдайлар басқармасы­ның инженері, азаматтық қорғау лейтенанты Данияр Аманжол.

Иә, адам өмірінен қымбат еш нәрсе жоқ. Сондықтан бассейнде болсын немесе табиғат аясында болсын, қай жерде демалсаңыз да қауіпсіздік ережелерін қатаң сақтап, балаларды қараусыз қалдырмай, тек рұқсат етілген орындарды таңдаған жөн. Өйткені бірсәттік немқұрайдылық орны толмас өкінішке әкелуі мүмкін.

Саятхан Сатылған, Жамбыл облысы