Қазақ палуандары ссирым күресінен бақтарын сынады

Қазақстандық палуандар корей ссирым күресі бойынша халықаралық жарысқа қатысты, деп хабарлайды 24KZ. Біріншілік Кореяның оңтүстігіндегі Ыйсон ауылында өтті. Бұл спорт түрі бойынша әлемнің үздік палуаны атағын алуға 8 елден келген 80 спортшы белдесті. Бір спортшымыз жүлдеге ие болды.

Ссирым – палуандар құмның үстінде күресетін спорт түрі. Осы себепті оларға қозғалу өте қиын. Осындай жарыс алаңын жасау үшін шамамен 18 тонна құм қажет.

Ссирым корей күресі жарысына Қазақстаннан 6 палуан келді. Олардың барлығы тәжірибелі спортшылар, бірақ басқа спорт түрлерінің: дзюдо, самбо және қазақ күресі шеберлері. Дзюдошы Ерболат Ташенов 2019 жылы Кореяда өткен турнирге қатысқан. Бұл жолы Қазақстан құрамасы жарысқа бір ай бұрын ғана шақырылды. Сол себепті біздің палуандар тыңғылықты дайындалып үлгермеді. Дегенмен Ерболат ширек финалға дейін жетті.

Ерболат Ташенов, ҚР дзюдо құрамасының мүшесі:

- Құмда күресу қиынырақ. Себебі әр қимыл қателікті кешірмейді. Артық қимыл жасасаң, жеңіліп қалуың мүмкін.

Ал Даяна Талғат үшін ссирым турниріндегі дебют сәтті болды. Ол 80 келіге дейінгі салмақ дәрежесінде қола медаль иеленді. 23 жастағы спортшымыз дзюдодан үш дүркін Қазақстан чемпионы.

Даяна Талғат, корей ссирым күресі бойынша чемпионаттың қола жүлдегері:

- Спорт өте күшті, бірақ бізде Алматыда ол дамымаған. Айырмашылық көп. Дзюдода біз кимономен шығамыз. Осы жарыста біз футболка және де шортымен шығамыз.

Қазақстанда ссирыммен шамамен 20-ға жуық адам шұғылданады. Бұл спорт түріне қызығушылық Көшпенділердің дүниежүзілік ойындары бағдарламасына енгеннен кейін артты. Алайда елімізде корей күресінен жаттықтырушылар жоқ, сондықтан олар Оңтүстік Кореяда өтетін турнирлердің бейнежазбаларын қарап үйренеді.

Владимир Пак, ҚР корей ссирым күресі командасының өкілі:

- Корей ссирым қауымдастығы бізді жарыстарға шақырып тұрады. Біз осы күрес бойынша маман жіберуді немесе бізді Кореяға біліктілікті арттыру курстарына шақыруды сұрап көргіміз келеді. Жалпы бұл қызықты күрес түрі. Әрі ол біздің халқымызға да жақын. Қазақтар да палуан, боксшылар еді. Бізде атақты палуандар мен боксшылар көп. Сондықтан бұл спорт түрі бізде де дамиды деп ойлаймын.

Оңтүстік Кореяда ссирым жарыстары мектеп оқушылары мен студенттердің арасында да өтеді. Мұнда бұл спорт түрімен кәсіби түрде 2 мыңнан астам адам айналысады. Ссирымды әлемде танымал ету үшін ұйымдастырушылар түрлі елдерден спортшыларды Кореяға шақырады.

Ли Джун Хи, Корея Республикасы ссирым қауымдастығының президенті:

- Біз келесі жылдан бастап корей ссирымын Азия ойындарына енгізуге дайындық жұмыстарын бастаймыз. Дзюдо секілді 10–20 жылдан кейін бұл спорт түрі бүкіл Азияға танымал болады деп үміттенеміз.

Егер корей күресі Азия ойындары бағдарламасына енсе және әлемнің кем дегенде 75 елінде ссирым федерациялары ашылса, ол олимпиадалық спорт түріне айналуы мүмкін.

Авторлары: Владислав Цой, Ольга Лян