Атырауда қазақ күресінен республикалық турнир басталды

Атырауда қазақ күресінен ересектер арасында Қазақстанның еңбек сіңірген жаттықтырушысы, Қызылқоға ауданының құрметті азаматы Мәлік Сүлейменовтың жүлдесіне арналған республикалық турнирдің жетінші маусымы басталды, деп хабарлайды Өңірлік коммуникациялар қызметі.

Биылғы жарыс Мәлік Сүлейменовтың 70 жылдық мерейтойымен тұспа-тұс келіп отыр. Осыған орай турнирдің ашылу рәсіміне облыстық Дене шынықтыру, спорт және туризм басқармасының басшылығы, Қызылқоға ауданы әкімінің орынбасары, ардагер бапкердің шәкірттері мен әріптестері қатысты.

Атырау облысы «Тарлан» қазақ күресі федерациясының атқарушы директоры Аманбай Қыздарбаевтың айтуынша, жарыс екі күн бойы ерлер және әйелдер арасында ауыр және жеңіл салмақ дәрежелері бойынша өтеді.

- Бұл – республика бойынша қазақ күресіндегі ірі төрт турнирдің бірі. Сондықтан қатысушылар жоғары ұпай жинауға бар күшін салуда, – деді ол.

Байрақты бәсекеге Батыс Қазақстан, Маңғыстау, Абай, Қарағанды, Ұлытау, Ақтөбе, Жетісу, Қызылорда, Атырау облыстары және Астана қаласынан келген 150-ден астам балуан қатысуда.

Жетісу облысының спортшысы Арман Есқазиев 82 кг салмақ дәрежесінде жеңімпаз атанды.

- Қарсыластар өте жақсы дайындықпен келген. Бұған дейін 74 кг салмақта чемпион болған едім. Биыл да жеңісті қолдан бермеуге тырыстым" – деді ол.

Сегіз салмақ санаты бойынша үздік нәтиже көрсеткен спортшылар «Дала қырандары» республикалық турниріне жолдама алады.

Бүгін, 18:14