Қазақ тазысы World Dog Show 2026 көрмесінде топ жарды

5-6 маусым күндері өткен жарыстарда қазақы тазы Club Show 2026, ENCI Winner 2026 және World Dog Show 2026 көрмелеріне қатысты. Барлық ұсынылған иттер «Өте жақсы» деген баға алып, отандық кинологтардың еңбегін дәлелдеді.

Club Show 2026 көрмесінде Лашын үздік тұқым өкілі атанса, ENCI Winner 2026 халықаралық жарысында Перс жеңімпаз болды. Перс өз жас санатындағы басқа тазы тұқымдарымен бәсекеге түсіп, төртінші орынға ие болып, тарихи нәтиже көрсетті.

World Dog Show 2026 көрмесінде Лашын тағы да үздік тұқым өкілі атанып, Челси мен Табиғат «Жас әлем чемпионы», ал Лашын мен Рея «Әлем чемпионы» атақтарын жеңіп алды. Сонымен қатар бірнеше қазақы тазы Италия чемпионы және Жас Италия чемпионы атақтарына ие болды.

Қазақстан алғаш рет беделді TOP Dog 2026 халықаралық шоуына қатысып, онда қазақы тазы Дастер таныстырылды. Аренада Қазақстанның мемлекеттік туы көрсетіліп, еліміздің атауы әлемдік кинологиялық қауымдастық алдында жарияланды.

Бұл жетістіктер қазақы тазының халықаралық деңгейде танымал бола бастағанын көрсетті. 2024 жылы Халықаралық кинологиялық федерация қазақы тазыны алдын ала мойындап, Қазақстанды тұқымның шыққан елі ретінде бекіткен болатын. Болоньядағы табысты өнер көрсету қазақы тазының толық халықаралық мойындалуына жасалған маңызды қадам болды.