Қазақ тазысы алғаш рет марафондық жүгіруге қатысты

Елордада жазғы жүгіру маусымының жабылуына арналған жүгіру жарысы өтті, – деп хабарлайды Aikyn.kz сайты.

Қатысушылар Триатлон саябағында 6,2 шақырым қашықтықты еңсерді. Спорттық іс-шара «Заң және тәртіп» идеологемасы аясында ұйымдастырылды. Бұл шараны тарихи оқиға деп атауға болады, себебі оған алғаш рет қазақтың тазы тұқымы қатысты.

Нейзи лақап аты бар қазақ тазысы иесі Абзал Досыманмен бірге 6,2 шақырым қашықтықты бағындырды. «Nomad» ұлттық аңшылық клубы қоғамдық қорының қатысушысы Абзал Досыманның айтуынша, клуб қазақ тазысының тұқымын сақтауға және кеңінен насихаттауға бағытталған.

«Маған бұл жүгіру жарысының Мемлекет басшысы ерекше назар аударып отырған үш маңызды бағытты — «Заң және тәртіпті», бұқаралық спортты дамытуды және қазақ тазысының тұқымын сақтауды біріктіргені ерекше ұнайды. Өйткені заң мен тәртіп әрқайсымыздан, яғни ережелерді сақтаудан, айналамыздағы адамдарға құрметпен қараудан және, әсіресе, үй жануарларына жауапкершілікпен қараудан басталады. Бүгін біз Нейзимен бірге 6,2 шақырым қашықтықты еңсердік. Бұл — ұлттық дәстүрлеріміздің заманауи қала өмірімен үйлесімді сабақтаса алатынының тағы бір дәлелі. Осындай іс-шараның бір бөлігі болғаныма қуаныштымын. Осындай мүмкіндік жасаған ұйымдастырушыларға алғысымды білдіремін», — деді Абзал Досыман.

Жүгіру жарысы қатысушыларды ортақ мақсатқа біріктіріп, спорт пен белсенді өмір салтын насихаттауға үлес қосты. Каникросстың халықаралық тәжірибесі бұл спорт түрінің әлемнің көптеген елінде кеңінен таралғанын көрсетеді. Ол жүгіруді иттермен бірге орындауды көздейді және белсенді өмір салтын ұстануға, жануарларға жауапкершілікпен қарауға үндейді. Қазақстанда бұл бағытты дамыту қазақ тазысының танымалдығын арттыруға, оның бірегей қасиеттерін кеңінен танытуға және ғасырлар бойы қалыптасқан дәстүрлерімізді сақтауға жаңа мүмкіндіктер ашады.

Мұндай бастамалар қоғамда тәртіп пен жауапкершілік мәдениетін қалыптастыруға, ұлттық мұраны сақтауға және салауатты өмір салтына деген қызығушылықты арттыруға ықпал етеді. Сонымен қатар, олар ұлттық құндылықтарымызды заманауи қоғамдық өмірмен ұштастырып, келер ұрпаққа жеткізуге мүмкіндік береді.