Қазақмыс кеніштердегі еңбек жағдайын жақсартуға кірісті

«Қазақмыс корпорациясы» ЖШС Жезқазған өңіріндегі кеніштердің өндірістік әлеуетін арттырумен қатар, жұмысшылардың еңбек және тұрмыстық жағдайын жақсартуға бағытталған ауқымды жаңғырту бағдарламасын жүзеге асырып жатыр.
Компания өндірістік инфрақұрылымды жаңартып, техника паркін күшейтуге және әлеуметтік нысандарды жөндеуге миллиардтаған теңге инвестиция бөлуде.

Бағдарламаның жүзеге асырылу барысын компанияның басқарма төрағасы Руслан Өскенәлі Жезқазған өңіріне жасаған жұмыс сапары кезінде талқылады. Ол Оңтүстік және Батыс Жезқазған кеніштеріндегі өндірістік бөлімшелердің жұмысымен танысып, еңбек ұжымдарымен кездесті.

Компания мәліметінше, кеніштердің үздіксіз жұмысын қамтамасыз ету үшін өздігінен жүретін тау-кен техникасын жөндеуге 6,7 млрд теңге бағытталған. Сонымен қатар өндірістік активтерді жаңғырту аясында техника сатып алу саясаты қайта қаралып, сенімділігі төмен жабдықтардан бас тарту туралы шешім қабылданған. Енді басымдық әлемдік жетекші өндірушілердің сервистік қолдауы жоғары техникаларына берілмек.

Осы мақсатта жалпы құны 9,9 млрд теңгеге 19 өздігінен жүретін бұрғылау қондырғысын сатып алу жоспарланған. Оның алғашқы сегізі жыл соңына дейін жеткізіледі деп күтілуде.

«Қазақмыс» өндірістік көрсеткіштермен қатар жұмысшылардың әлеуметтік-тұрмыстық жағдайына да ерекше көңіл бөліп отыр. Оңтүстік Жезқазған кенішінде №65 шахтаның тұрмыстық корпусы жөнделіп, ауданы 2,9 мың шаршы метр болатын әкімшілік-тұрмыстық комбинаттың шатыры күрделі жөндеуден өтеді.

Ал Батыс Жезқазған кенішінде №73–75 шахталарының әкімшілік-тұрмыстық кешені мен жылы өткелі жаңартылып, №67 шахтадағы жуыну және киім ауыстыру бөлмелері толық жөнделмек.

Жұмысшыларды арнайы киіммен, жеке қорғаныс құралдарымен және ыстық тамақпен қамтамасыз ету мәселесі де компания басшылығының бақылауында екені айтылды.

Өндірістегі қауіпсіздік мәселесі де назардан тыс қалмаған. Кәсіпорындар үшін жалпы құны 2,5 млрд теңгені құрайтын 25 заманауи реанимобиль сатып алынған. Арнайы техникалар өндірістік алаңдарға кезең-кезеңімен жеткізіледі.

Сонымен бірге ішкі қызмет көрсету жүйесін жетілдіру мақсатында бірқатар техникалық жұмыстарды мердігерлерсіз, арнайы дайындықтан өткен кәсіпорын мамандарының өз күшімен атқару мүмкіндігі қарастырылып жатыр. Бұл өндірістік процестердің тиімділігін арттырып қана қоймай, қызметкерлердің қосымша табыс табуына мүмкіндік береді.

Жұмыс сапарының қорытындысында Руслан Өскенәлі қабылданған шешімдердің нақты нәтиже беруі маңызды екенін атап өтті.

«Біздің міндетіміз – өндірістік жоспарды орындаумен қатар, адамдарға қауіпсіз әрі қолайлы еңбек жағдайын жасау. Көтерілген барлық мәселе нақты шешімін тауып, тұрақты бақылауда болуы тиіс», – деді компания басшысы.

Сарапшылардың пікірінше, өндірістік қауіпсіздікке, еңбек жағдайына және әлеуметтік инфрақұрылымға бағытталған мұндай инвестициялар кен өндіру саласындағы кадр тұрақтылығын қамтамасыз етіп, кәсіпорындардың тиімділігін арттыруға ықпал етеді.