Қазақстан 5 жылда шетелге ₸17,4 млрд гуманитарлық көмек жіберді

Қазақстан кейінгі бес жылда шетелге гуманитарлық көмек ретінде 17 млрд теңгенің тауарын жіберді. Көмек алған елдер қатарында Палестинадан бөлек, Қырғызстан, Тәжікстан, Түркия, Ауғанстан, Украина, Пәкістан, Сирия және Вьетнам бар. Осындай маңызды қадамдар арқылы Қазақстан жаһандық аренадағы жауапты әрі сенімді әріптестік рөлін нығайтып келеді.

Гуманитарлық көмек – қайырымдылық қана емес, елдер арасындағы достық қарым-қатынасты айқындайтын құрал. Алыс-жақын мемлекеттердегі әлеуметтік-экономикалық тұрақтылықты қолдауға және төтенше жағдайлардың салдарын жоюға Қазақстан қол ұшын созып келеді. Мұндай миссияларды үйлестіретін KazAID ұйымының мәліметі бойынша 2021 жылы шетелге 6 млрд теңгеге жуық гуманитарлық көмек жіберілді. Олар Қырғызстан, Тәжікстан және Ауғанстандағы экономикалық тұрақтылықты қолдауға және пандемиямен күрес шараларына арналған.

Бұл көмек түрі 2022 жылы да жалғасып, тізімге табиғи апат пен геосаяси жағдайға байланысты Пәкістан мен Украина қосылды.

KazAID:

- 2022 жылы көмек Тәжікстанға, Қырғызстанға, Ауғанстанға, Украинаға және Пәкістанға көрсетілді. Украинаға дәрілік препараттар, азық-түлік және киім түрінде ауқымды көмек, Ауғанстанға азық-түлік және шатырлар, Пәкістанға қаржылай көмек 400 000 АҚШ доллары, Қырғызстан мен Тәжікстанға тұқымдар, экскаватор және дизель отыны жіберілді.

Ал 2023 жылы Түркия мен Сирияда жойқын жер сілкіністері тіркелді. Салдарынан мыңдаған адам көз жұмып, тағы мыңдағаны жарақат алды. Зілзаладан зардап шеккендерге KazAID есебінен 1,5 млн доллар мен материалдық көмек жолданды. Сонымен қатар Ұлттық волонтерлік желі қосымша қолдау көрсетіп, мың тоннаға жуық жүк жөнелтті.

Айбек Досымбетов, Ұлттық волонтерлер фронт-кеңсесі жобасының жетекшісі:

- Онымен қоса ұлттық волонтерлер желісі арнайы есепшот ашып, қаржылай көмек жиналды. Ол кезде 150 млн теңгеге жуық қаржылай көмек жиналып халықтан, Түркия еліндегі апат қорына аударылған болатын. Гуманитарлық көмектің астарында екі ел арасындағы достықтың белгісі бар. Бауырлас елдердің байланысы нығаюына үлкен септігін тигізеді.

Былтыр аймақтық тұрақтылықты, инфрақұрылымдық дамуды қолдау үшін Қырғызстан, Тәжікстан, Ауғанстан мен Вьетнамға 5 млрд теңгеге жуық гуманитарлық көмек берілді. Қазақстан биыл да маңызды миссиядан қол үзген жоқ. Жыл басынан бері Тәжікстанға 5 мың тонна мазут, Ауғанстанға үш жарым тонна дәрі-дәрмек, 2 мың тоннадан астам азық-түлік пен тұрмыстық бұйымдар жіберілді.

Авторы: Еркебұлан Смадияров