Газа секторына екі жылда $335 мың гуманитарлық көмек жіберілді

Қазақстан Газа секторына дәрі-дәрмек, вакцина, шатыр, жылы киім мен гигиеналық заттары бар гуманитарлық көмек жіберіп жатыр.

Екі жылда көрсетілген көмектің көлемі 335 мың доллардан асады. Бұл туралы ЮНИСЕФ-тің еліміздегі өкілдігі хабарлады. Жалпы ЮНИСЕФ өз тарапынан биыл мамыр мен қыркүйек аралығында Газа секторына 674 жүк көлігін жөнелткен. Қазіргі таңда Палестина аумағында ауыз су тапшы, 320 мың бала аш құрсақ отыр. Ел бойынша тек 14 аурухана ғана жұмыс істейді.  

 Эльвира Яушева, ЮНИСЕФ-тің Қазақстандағы қоғамдық байланыстар және жастармен жұмыс бөлімінің басшысы:

 - Бүгінде тағы 1300-ге жуық жүк көлігі шекара аумағында дайын тұр. Соңғы атысты тоқтату кезеңінде 40 жүк көлігі Палестина аумағындағы бейбіт тұрғындарға жөнелтілді. Гуманитарлық көмек негізінен Керем-Шалом шекара өткелі арқылы жеткізіледі. Сонымен қатар Мысыр, Иордания, Израиль және Батыс жағалау арқылы өтеді. ЮНИСЕФ тек ресми гуманитарлық дәліздер арқылы жұмыс істейді, Біріккен Ұлттар Ұйымы мен жергілікті серіктестермен тығыз қатынаста. Тиелген жүк тіркеліп, соңғы жеткізу нүктесіне дейін бақылауда болады.