Израиль Газа секторына әуеден соққы жасады

Израиль ұшақтары сейсенбі күні Израиль ХАМАС-ты Палестина аумағындағы атысты тоқтату режимін бұзды деп айыптағаннан кейін Газа секторына соққы берді.

AlJazeera-ның жергілікті денсаулық сақтау органдарына сілтеме жасай отырып хабарлауынша, әуе шабуылдары салдарынан кем дегенде 90 адам, соның ішінде Газаның орталығында кемінде 42 палестиналық, анклавтың солтүстік бөлігінде 31 адам және оңтүстікте 18 адам қаза тапқан.

Куәгерлердің айтуынша, Израильдің әуе шабуылдары сәрсенбінің таңына дейін бүкіл Газа секторы бойынша жалғасты.

Шабуылдар Израиль премьер-министрі Биньямин Нетаньяху кеңсесінің дереу қуатты соққы жасауға бұйрық бергені туралы мәлімдемесінен кейін болды.

Мәлімдемеде шабуылдардың нақты себебі көрсетілмеген. Алайда Израиль әскерлері ХАМАС анклавтың Израиль бақылауындағы аймағында Израиль күштеріне шабуыл жасау арқылы атысты тоқтату келісімін бұзғанын мәлімдеді.

АҚШ қолдаған атысты тоқтату туралы келісім 10 қазанда күшіне еніп, Газа секторындағы екі жылдық соғысты аяқтаған еді.

Келісімнің бұзылу қаупі жоқ

Осы арада Израиль мен ХАМАС бір-бірін атысты тоқтату режимін бұзды деп айыптап жатыр.

Өткен аптада Израильге барған АҚШ вице-президенті Джей Ди Вэнс соңғы эскалацияға қарамастан, «атысты тоқтату тәртібі сақталып отыр» деп мәлімдеді.

- Бұл қандай да бір жерде шағын қақтығыстар болмайды дегенді білдірмейді. Біз ХАМАС немесе Газадағы басқа біреудің сарбазға (израильдік) шабуыл жасағанын білеміз. Біз израильдіктердің кек қайтаратынын күтеміз, бірақ менің ойымша, президент бұған қарамастан сабыр сақтайды, - деді ол тілшілерге.

Президент Трамп сәрсенбі күні АҚШ қолдап отырған атысты тоқтату режиміне қауіп төніп тұрмағанын мәлімдеді.

Оның айтуынша, Израиль өз сарбазының қазасынан кейін жауап соққы жасады.

Не болды?

Сейсенбі күні Израиль БАҚ-тары Газа секторының оңтүстігіндегі Рафах қаласында Израиль күштері мен ХАМАС содырлары арасында атыс болғанын хабарлады.

ХАМАС Рафахтағы Израиль күштеріне жасалған шабуылға жауапкершілікті мойнына алған жоқ. Сондай-ақ, топ Газа секторындағы атысты тоқтату туралы келісімге адал болып қала беретінін мәлімдеді.

Кепілге алынғандарды іздеу

Бұдан басқа, сейсенбі күні Израиль премьер-министрі Биньямин Нетаньяху ХАМАС кепілге алынғандардың денелерін Израильге қайтару кезінде кейбір сүйектерді тапсыруда атысты тоқтату келісімін бұзғанын мәлімдеді.

Нетаньяху дүйсенбіде тапсырылған сүйектер 2023 жылдың 7 қазанында ХАМАС шабуылында қаза тапқан бұрын анықталған кепілге алынған адамға тиесілі екенін мәлімдеді. Царфатидің сүйектерін Израиль әскерилері 2023 жылдың желтқсанында тапқан еді.

Жауап ретінде ХАМАС Газа секторындағы туннельден табылған, кепілдікте жоғалған адамның денесін сейсенбіде Израильге тапсыратынын мәлімдеді. Алайда, ХАМАС-тың «Әл-Кассам бригадалары» қарулы қанаты кейінірек Израильдің атысты тоқтату оежимін бұзғанын айтып, жоспарланған тапсыруды кейінге қалдыратынын мәлімдеді.

Сейсенбі күні кешке «Әл-Кассам бригадалары» Газа секторындағы іздеу операциялары кезінде екі израильдік кепілге алынған адамның денелері табылғанын мәлімдеді.

ХАМАС Нетаньяху Израильдің міндеттемелерінен бас тарту үшін сылтау іздеп жатыр деп мәлімдеді. Атысты тоқтату туралы келісімнің шарттары бойынша ХАМАС соғыс кезінде ұсталған 2 мыңға жуық палестиналық тұтқын мен соғыс кезінде ұсталған адамдарды босатты, ал Израиль өз күштерін шығарып, шабуылын тоқтатты.

Бұған дейін Түркия Израильді Газадағы атысты тоқтату режимін сақтауға шақырғанын жазған болатынбыз.