Қазақстан Әскери теңіз күштерінің бұрынғы бас қолбасшысы ұсталды

Қазақстанда Әскери-теңіз күштерінің бұрынғы бас қолбасшысы ұсталып, уақытша ұстау изоляторына қамалды. Сот оны қамауға алуды санкциялады, деп хабарлайды Tengrinews.kz тілшісі.

Бұл туралы Ішкі істер министрлігі Tengrinews.kz редакциясының сауалына берген жауабында мәлімдеді.

"ІІМ әскери-тергеу бөлінісі Каспий теңізіндегі жаттығу кезінде әскери қызметшілердің қаза болуы дерегі бойынша қылмыстық істі тергеу аясында, қызметіне салғырт қарағаны үшін Қазақстан Қарулы күштері Әскери-теңіз күштерінің бұрынғы бас қолбасшысы, 1-дәрежелі капитанды ұстап, уақытша ұстау изоляторына қамады", - деп хабарлады ІІМ.

Соттың санкциясымен ол қамауға алынды. Сотқа дейінгі тергеу жалғасып жатыр.

Айта кетейік, Қазақстан ӘТК бас қолбасшысы лауазымын Қанат Ниязбеков атқарған болатын. Өткен сенбіде ол, сондай-ақ Қорғаныс министрінің екі орынбасары қызметтерінен босатылды. Тиісті өкімге Мемлекет басшысы Қасым-Жомарт Тоқаев қол қойды.

Материал толықтырылып жатыр.

Бізді Google-дың негізгі дереккөздер тізіміне қосыңыз