Қазақстан Азия мен Еуропаны байланыстырады

Люксембургте Еуроодақ, Оңтүстік Кавказ және Орталық Азия елдерінің сыртқы істер министрлері деңгейіндегі алғашқы кездесу болып өтті.

 Шара көлік байланысын дамыту мәселелеріне арналды. Қазақстан Еуропа мен Азияны жалғайтын маңызды бағыт — Орта дәлізді нығайту жөніндегі ұсыныстар білдірді. Кездесуге еліміздің атынан Сыртқы істер министрінің орынбасары Арман Исетов қатысты. Жиында Транскаспий бағытына ерекше назар аударылды. Оның дамуы Қазақстан мен Еуроодақ арасындағы ынтымақтастықтың басым бағыттарының бірі саналады. Биыл кеңейтілген әріптестік туралы келісімге қол қойылғанына 10 жыл толады. Қазақстан аймақтағы ең ірі экономика және маңызды транзиттік торап сонымен бірге құрлықаралық байланысты нығайтуда жетекші роль атқарады. Тараптар Орта дәліздің өткізу қабілетін арттыру, мультимодальді бағыттарды дамыту және тасымал ағындарын цифрландыру мәселелерін талқылады. Қазақстан инфрақұрылымға 35 миллиард доллар инвестиция құйып, алдағы жылдары тағы 15 миллиард доллар салуды жоспарлап отыр. Оңтүстік Кавказдағы жағдайдың тұрақталуы жаңа балама жол тармағының ашылуына мүмкіндік береді.

Роман Василенко, Бельгиядағы Қазақстан елшісі:

- Қазірдің өзінде Орта дәліздің өткізу қуаты жылына шамамен 6 миллион тонна. Бірақ Қазақстан, Әзербайжан, Грузия, Түркия және өзге елдердің инвестицияларын ескере отырып, бұл көрсеткіш алдағы 4 жылда 10 миллион тоннаға жетеді деп ойлаймыз.