Қазақстан бюджетіне 335 миллиард теңге түспей қалды ЖАП басшысы

Бюджет тапшылығын қысқарту жөніндегі жоспарды орындау қиынға соғуы мүмкін, ал мемлекеттік кірістер бойынша болжамдар тым оптимистік болып шықты. Жоғары аудиторлық палата (ЖАП) төрағасы Әлихан Смайылов бюджеттік жоспарлаудағы олқылықтарды атап өтті, деп хабарлайды Tengrinews.kz тілшісі.

Бюджет тапшылығын қысқарту жөніндегі жоспарды орындау қиынға соғуы мүмкін, ал мемлекеттік кірістер бойынша болжамдар тым оптимистік болып шықты. Жоғары аудиторлық палата (ЖАП) төрағасы Әлихан Смайылов бюджеттік жоспарлаудағы олқылықтарды атап өтті, деп хабарлайды Tengrinews.kz тілшісі.

Смайыловтың айтуынша, 2025 жылғы ЖІӨ-нің нақты көлемі болжамнан 9 триллион теңгеге асып кеткеніне қарамастан, бюджетке 335 миллиард теңге түспей қалған. Оның сөзінше, бұған бюджетті қалыптастыру кезінде күтілетін салық түсімдерін асыра бағалау басты себептердің бірі болған.

"Мұның бәрі жоспарлаудағы кемшіліктер мен салықтық болжамдардың тым оптимистік болуының салдары", - деді Смайылов.

ЖАП басшысы бұған дейін аудиторлар кірісті болжау әдістемесінің бұзылғанына нұсқағанын еске салды. Оның айтуынша, есептеу кезінде асыра көрсетілген параметрлер, сондай-ақ қолданыстағы әдістемеде қарастырылмаған қосымша түсімдер пайдаланылған.

Әлихан Смайылов асыра көрсетілген болжамдарды қалыптастыру алдағы жылдары салық базасының қысқаруына әкеп соғатынын айтты.

Жоғары аудиторлық палатаның бағалауынша, 2025 жылы бюджетке 2026 жылға тиесілі 154 миллиард теңге көлемінде төлемдер аударылған. Сонымен қатар мемлекет салық төлеушілерге 900 миллиард теңгеге жуық қосылған құн салығы қайтарылмаған. Палата төрағасының айтуынша, мұндай шаралардың өзі бюджеттің кірісі мен шығысын теңестіруге мүмкіндік бермеген.

"2025 жылдың қорытындысы бойынша жоспарланған 244 миллиард теңге бөлінбеді, сондай-ақ едәуір мөлшерде кредиторлық берешек қалыптасты", - деді ол.

Сондай-ақ Смайылов бюджет тапшылығы әлі де айтарлықтай жоғары екенін атап өтті. Оны қысқарту жоспарлары қабылданғанымен, аудиторлар олардың орта мерзімді перспективада іске асуын екіталай деп санайды.

Бұған дейін салық реформасының арқасында Қазақстан бюджеті толыға түскені хабарланған болатын. Қаржы вице-министрі Ержан Біржановтың айтуынша, жыл басынан бері Қазақстанның республикалық бюджетіне салық түсімдері 3,6 триллион теңгеге дейін өскен, бұл былтырғы сәйкес кезеңмен салыстырғанда 900 миллиардқа артық.

Тағы оқыңыз: Жаңа салықтар Қазақстан бюджетін “байытты”: Қаржы министрлігі деректері

Google News арқылы жаңалықтарымызды қадағалаңыз