Қазақстан Дружба арқылы транзиттің тоқтатылатыны туралы ресми ақпарат алған жоқ Скляр

АСТАНА, 22 сәуір – Sputnik. Қазақстан "Дружба" мұнай құбыры арқылы транзиттің тоқтатылатыны туралы ресми ақпарат алмаған. Бұл туралы бірінші вице-премьер Роман Скляр #RES2026 аймақтық экологиялық саммиті алаңында мәлімдеді.

Дегенмен ол Sputnik Қазақстан тілшісіне мұндай ақпарат бар екенін айтты.

"Ондай ақпарат бар, бірақ қандай да бір себептермен "Дружба" мұнай құбыры жабылып қалуы мүмкін деген ақпарат ресми түрде әлі түскен жоқ. Тіпті солай болған жағдайда да бұл біздің мұнай өндіру саламызға айтарлықтай әсер етпейді", – деді Скляр.

Ол сондай-ақ балама дәстүрлі бағыттар, мысалы Каспий құбыр консорциумы бар екенін атап өтті.

"Мұнай жиналып қалатындай жағдай емес. Бұл маршруттардың бірі ғана", – деді Роман Скляр.

Қазақстанның энергетика министрі Ерлан Ақкенженов 2025 жылы "Дружба" құбыры арқылы 2,1 млн тонна мұнай жіберілгенін хабарлады. 2026 жылы шамамен 3 млн тонна жөнелту жоспарланып отыр. Сонымен қатар Қазақстан Германиядағы Шведт зауытының мұнай тұтыну көлемінің шамамен 20–30%-ын жауып отыр.

Роман Скляр сияқты ол да мұнай өндіру көлемін азайту жоспарланбағанын айтты.

"Өндіріс көлемін азайту қарастырылмаған. Бізде мұнайды басқа бағыттарға қайта бөлу мүмкіндігі бар", – деді министр.

Сондай-ақ ол "Дружба" құбыры арқылы қазақстандық мұнай транзитінің ықтимал тоқтауы техникалық себептерге байланысты болуы мүмкін екенін айтты.

"Ресей тарапынан ресми мәлімдеме әлі жасалған жоқ, бірақ бейресми деректер арқылы біліп отырмыз", – деді ведомство басшысы.

Каспий құбыр консорциумы бойынша жағдай тұрақты екенін ол да растады.

"Бізде жағдай қалыпты, бәрі тұрақты жұмыс істеп тұр", – деп атап өтті Ақкенженов.

"Дружба" мұнай құбыры арқылы Қазақстан Германияға мұнай жеткізеді.