Техникалық мүмкіндік жоқ : Ресей Дружба арқылы Қазақстан мұнайын айдауды тоқтатты

Қазақстан мұнайы енді Германиядағы Шведт мұнай өңдеу зауытына «Дружба» жүйесі арқылы жеткізілмейді. Мамыр айынан бастап және екінші тоқсан бойы транзиттің толық тоқтайтынын энергетика министрі Ерлан Ақкенженов хабарлады.

Министрдің айтуынша, ресейлік тарап Астананы бейресми түрде шикізатты айдау мүмкін еместігі жөнінде ескерткен. Ол мұны Ресей аумағындағы энергетикалық нысандардың зақымдануымен байланысты болуы ықтимал деп түсіндірді.

«Бейресми деректерге сүйенсек, бұл рас. Мамыр айында Шведт зауытына «Дружба» бағыты бойынша мұнай транзиті болмайды. Ресей тарапы техникалық мүмкіндік жоқ екенін мәлімдеп отыр. Бұл соңғы уақытта Ресей инфрақұрылымына жасалған шабуылдармен байланысты болуы мүмкін. Мен осылай деп топшылаймын», – деді Ерлан Ақкенженов.

Неміс зауытына соққы

Индикативтік жоспарға сәйкес, 2026 жылдың екінші тоқсанына айдау кестелері толық тоқтатылды. Бұл шешім Шведттегі неміс мұнай өңдеу зауыты үшін аса маңызды, себебі ол 20–30 пайызға қазақстандық мұнайға тәуелді.

2025 жылы Қазақстан осы бағытпен 2,1 млн тонна мұнай жеткізген. Биыл көлемді 3 млн тоннаға дейін арттыру жоспарланған еді.

Мұнай қайда бағытталады?

Еуропалық маршруттың жабылуына қарамастан, Энергетика министрлігі елде мұнай өндіру көлемін қысқарту жоспарланбайтынын мәлімдеді. Босап қалған көлемдер жедел түрде қайта бөлінеді.

Негізгі бағыттар:

Каспий құбыр консорциумы (КТК), онда жағдай тұрақты; Қытайға экспорт.

«Жағдай бақылауда, өндіру жоспарланған деңгейде сақталады», – деп атап өтті ведомство.

Бүгін, 13:04