Қазақстан еуропалық телепродюсерлерді қызықтырды

Қазақстанда қыста таспаланған халықаралық «Бейжің экспресс – Мұзды бағыт» тревел-шоуының авторлары елімізге қайта оралып, жобаның жаңа маусымын түсіруі мүмкін. 

Жобаның шарты бойынша, 10 жұпқа күніге жолға, тамаққа және түнеуге небәрі 1 еуро беріледі. Олар көшедегі көлікті тоқтатып діттеген жеріне ақысыз жеткен, құдайы қонақ болып жергілікті тұрғындардың үйіне барған. Ойыншылар қазақ халқының дархан көңілінің арқасында әр қалада төрге шығып, ұлттық тағамдардан дәм татқан, тегін түнеген. Жеңімпаз жұп шамамен 50 миллион теңгеге ие болған. «Шетелдік продюсерлердің пікірінше, көктемде Қазақстанды тағы бір қырынан танытуға болады: басқа ландшафттар мен бағыттар еліміздің туристік әлеуетін жаңа қырынан аша түсер еді», - дейді олар. 

Сафи Дейли, жобаның желілік продюсері:

- Осы маусымда біз елдеріңіздің қаншалықты әдемі екенін байқадық. Егер Қазақстан туралы көбірек ақпарат беретін болсақ, туристер саны арта береді. Бізге қатты ұнады және тағы да баруды жоспарлап отырмыз.

Астана, Алматы және өзге де қалаларда ұйымдастырылған сын-қатерлер өте қиын, ал кей жерлерде тіпті экстремалды болды дейді продюсерлер. Жоба да алдын ала үлкен дайындықты талап еткен: түсірілімге рұқсат алудан бастап, виза рәсімдеуге дейін Қазақстанның Бельгиядағы елшілігі көмектесіпті. 20 жылдық тарихы бар жобаны таспалау барысында 120 адамнан тұратын топ 26 күн бойы жұмыс істеген. Әдетте бір шығарылымын тек теледидар арқылы 2,5 миллионға дейін көрермен тамашалайтын шоу бұл жолы да жоғары рейтингке ие болған.

Людо Поппи, жобаның негізін қалаушы:

- Біздің шоу өте танымал. Орташа алғанда, кешкі аудиторияның шамамен 25 пайызы көреді. Францияда көрермендердің саны шамамен 2,5 миллион, Румынияда 1,5 миллион болуы мүмкін. Барлығы халық санына байланысты. Маңызды мәселе – әр елдің өз нұсқасы бар: итальян, испан, поляк, чех тілдерінде де өнім өндіреміз.