Қазақстан картасынан қанша ауыл жойылды?

Қазақстанда бір жыл ішінде ауылдар саны бірден 83-ке азайды. Қазір ел бойынша шамамен 6,1 мың ауыл қалды. Мұндай деректерді Datahub келтіреді, деп хабарлайды Arasha.kz.

Бұл бір реттік жағдай емес. Ауылдардың жойылу процесі 25 жылдан астам уақыт бойы жүріп жатыр, бірақ соңғы жылдары бұл үдеріс айтарлықтай жеделдеген. Егер 2020-2022 жылдар аралығында ауылдар саны 46-ға азайса, 2023-2025 жылдар аралығында бұл көрсеткіш 199-ға жетті.

Өткен жылы негізгі қысқартулар үш солтүстік өңірге — Солтүстік Қазақстан, Ақмола және Павлодар облыстарына тиесілі болды.

«Жалпы кему көрсеткішінің шамамен 80%-ы осы аймақтардың үлесінде. «Әділет» жүйесінде жарияланған құжаттарға сәйкес, аталған кезеңде бұл өңірлерде 68 ауыл таратылып, тек бір ғана жаңа ауыл құрылған, ол Астананың іргесіндегі Ақмола облысы Целиноград ауданындағы Нұрлы ауылы», - делінген хабарламада.

Кейбір ауылдарда дерлік ешкім тұрмаған. Мысалы, Малая Парамоновка ауылында бірде-бір тұрғын тіркелмеген. Мирное және Калиновка ауылдарында сәйкесінше бір және екі адам ғана өмір сүрген.

Заң бойынша, егер елді мекенде қатарынан үш жыл бойы 50-ден аз адам тұрса, ол таратылуы мүмкін. Әдетте бұл ауылдың тізілімнен шығарылып, ең жақын орналасқан ірі елді мекенге қосылуын білдіреді. Ресми түрде бұл шешім тұрғындардың пікірін ескере отырып қабылданады және олардың уәжі ашық жиналыста тыңдалуы тиіс.