Қазақстан мал шаруашылығы өнімдерін Грузия арқылы әлемдік нарыққа шығармақ

20-24 сәуір аралығында Грузияда сүт және ет өндірісіне арналған Dala.Camp Georgia халықаралық форумы өтті. Іс-шараға Қазақстан, Грузия, Өзбекстан, Әзірбайжан, Қырғызстан, Тәжікстан және Түрікменстаннан 100-ден астам қатысушы жиналды. Бес күн бойы фермерлер, өңдеушілер, инвесторлар мен сала сарапшылары мал шаруашылығын дамытудың негізгі бағыттарын және өнімнің бәсекеге қабілеттілігін арттыру жолдарын талқылады.

Форумның маңызды оқиғаларының бірі — Turan қазақстандық мал өсірушілер қауымдастығы, Trouw Nutrition (Нидерланды) және Nutrimax (Грузия) арасында өзара түсіністік туралы меморандумға қол қойылуы болды. Құжат мал шаруашылығындағы ынтымақтастықты дамытуға, оның ішінде өндіріс тиімділігін арттыруға және азықтандыру мен басқарудың заманауи тәсілдерін енгізуге бағытталған.

Келісім аясында қазақстандық ет, сүт, тері, жүн және басқа да өнім түрлерін экспорттауға қолдау көрсету көзделген. Сонымен қатар тараптар жемшөп өндірісі, генетика, ветеринария және фермаларды басқару салаларында технология алмасып, бірлескен білім беру бастамаларын іске асыруды жоспарлап отыр.

Форум барысында Turan қауымдастығының басқарма төрағасы Жәнібек Кенжебаев пен Грузияның қоршаған ортаны қорғау және ауыл шаруашылығы вице-министрі Лаша Авалиани арасында жұмыс кездесуі өтті. Кездесу барысында қазақстандық өнімдерді Грузия нарығына жеткізу және осы ел арқылы басқа мемлекеттерге экспорттау, сондай-ақ Қазақстанның агроөнеркәсіп кешеніне грузин инвестицияларын тарту мәселелері талқыланды.

Жақын уақытта Грузияның салалық министрлігімен жеке меморандумға қол қою жоспарланып отыр.

— Бүгінде Қазақстан мал шаруашылығын дамытудың ашық, технологиялық және экспортқа бағдарланған жаңа моделін қалыптастырып жатыр. Форум алаңында қол жеткізілген уағдаластықтар — бұл жай ғана формальдылық емес, нарықтарымызды интеграциялаудың нақты қадамы. Біз білім алмасудан бірлескен жобаларға, диалогтан нақты жеткізілімдер мен серіктестіктерге бағытталған жүйелі қозғалысты көріп отырмыз, — деді Жәнібек Кенжебаев.

Форум аясында қатысушылар рациондарды қалыптастырудан бастап, азықтандыруды басқару, шығындарды азайту және шаруашылықтардың өнімділігін арттыруға дейінгі тиімділік мәселелерін талдады. Сондай-ақ NutriOpt бағдарламасының мүмкіндіктері мен оны тәжірибеде қолдану жолдарына ерекше назар аударылды.

Қатысушылар Кахетия өңіріндегі Nutrimax заманауи өндірістік кәсіпорнына барып, жем өндіру технологиясымен, сапаны бақылау жүйесімен және өндірісті ұйымдастыру ерекшеліктерімен танысты.

Форум бағдарламасында Қазақстаннан ұсынылған практикалық кейстер де кеңінен талқыланды. Қатысушылар сүт және етті мал шаруашылығындағы тәжірибелерін бөлісіп, шаруашылық экономикасы, басқару тәсілдері және бизнесті масштабтау модельдері туралы баяндады.

— Қазақстан бүгінде тәжірибені қабылдап қана қоймай, халықаралық деңгейде қолдануға болатын тиімді шешімдер ұсынатын сараптама орталығына айналып келеді, — деп атап өтті Жәнібек Кенжебаев.

Dala.Camp Georgia форумының спикерлері қатарында Нидерландының Грузиядағы елшісі Мелина Аракелян, Trouw Nutrition компаниясының Шығыс Еуропа және Орталық Азия бойынша коммерциялық директоры Роланд Ван Дален, NutriOpt бағдарламасы бойынша маман Ярослав Ципс, Nutrimax негізін қалаушы Бека Бекаиа, компанияның бас директоры Гиорги Читаишвили, Nutrimax Kazakhstan директоры Реваз Лапачи, Tiar-Invest зоотехнигі Дильшод Набиев, Unicorn Feed Limited компаниясының бас директоры Руслан Какенов және басқа да сала өкілдері болды.

Ұйымдастырушылардың мәліметінше, Dala.Camp алаңы өндірушілерді, инвесторларды және сарапшыларды біріктіретін халықаралық кәсіби қауымдастыққа айналып келеді.

— Біз бүгінде тек саланы талқылап қана қоймай, оның болашағын бірге қалыптастыратын толыққанды экожүйенің құрылып жатқанын көріп отырмыз. Dala.Camp Қазақстан шеңберінен шығып, білім, технология және бизнес үшін халықаралық платформаға айналуда, — деді Жәнібек Кенжебаев.

Еске сала кетейік, 2026 жылдың ақпан айының басында Turan мал өсірушілер қауымдастығы Бурабайда 11 елден 250-ге жуық делегаттың басын қосқан Dala.Camp халықаралық форумын өткізген болатын.

Экожүйені дамытудың келесі кезеңі — Dala.Camp ұлттық мал шаруашылығы экспедициясы болмақ. 2026 жылғы 1 мамырда Астанада басталатын жоба еліміздің кемінде 10 өңірін қамтып, 40-қа жуық қатысушыны біріктіреді. Реалити-шоу элементтері бар бұл далалық білім беру медиа жобасы аясында қатысушылар 6000 шақырымнан астам жол жүріп, жетекші шаруашылықтарды аралап, практикалық тәжірибе жинақтайды.

Экспедиция Dala.Camp бастамаларының логикалық жалғасы болып, мал шаруашылығын дамытуға, адами капиталды нығайтуға және саланы Қазақстан экономикасының негізгі өсім нүктелерінің біріне айналдыруға бағытталған.

Айта кетейік, бұған дейін Қазақстан Грузияға экспорт көлемін арттыратыны хабарланды.