Қазақстан мен Кореяның достық кеші өтті

Оңтүстік Кореяның Тэгу қаласында Қазақ-корей достығына арналған кеш өтті. Игі шараға Корея–Қазақстан қауымдастығы мұрындық болды. 

18 жыл бұрын құрылған бұл ұйымға шамамен 60 адам мүше. Олардың басым бөлігі – медицина қызметкерлері. Қауымдастық мүшелері жыл сайын Алматы қаласы мен облысына барып, ауыл тұрғындарына медициналық көмек көрсетеді. Қазақстандық балаларға тегін операция жасап, еліміздің дарынды студенттеріне шәкіртақы тағайындайды. Осы орайда Қауымдастық мүшелерінің волонтерлік және қайырымдылық қызметіне Қазақстанның Пусан қаласындағы Бас консулы Аслан Асқар алғыс айтты. Достық кеші аясында «Хангук» университетінің профессоры Дулат Бақышев қазақ тарихы туралы арнайы дәріс оқыды.

Дулат Бақышев, Хангук шет тілдер университетінің профессоры

- Бұл менің соңғы екі айдағы екінші дәрісім. Алдыңғы айда да Тэгуге келіп, кеттім. Бірінші дәріс ол сақтарға, Жібек жолына қатысты болды. Бүгінгі дәрісім олардың өтініші бойынша Қыпшақ хандығы мен одан бергі қазақтың, Орта Азия халықтарының тарихы туралы айтып бердім. Қызығушылық өте көп. Олар мені тыңдағылары келмеген шығар, Қазақстан, біздің Орта Азия туралы, біздің аймақ туралы білгілері келген шығар.

Сон Су Сан, Корея-Қазақстан қауымдастығының президенті:

- Біз жыл сайын Алматыға барамыз, ал соңғы 10 жылда Үштөбеге де барып жүрміз. Қазақстанның қалай дамып жатқанына таңғаламыз. Егер 90-шы жылдардағы жағдайды қазіргімен салыстырсақ, жер мен көктей айырмашылық бар. Біз Корея-Қазақстан қауымдастығының мүшесі болғанымызды мақтан тұтамыз және елдеріміз арасындағы қарым-қатынасты нығайту үшін қолдан келгеннің бәрін жасаймыз.