Қазақстан мен Қытай теміржол операторлары құны 400 млн долларлық келісімдерге қол қойды

АСТАНА, 15 шілде – Sputnik. Қазақстан мен Қытай теміржол өкілдері өзара ынтымақтастықты дамытуға бағытталған келісімдерге қол қойды, деп хабарлайды Қазақстан темір жолы.

ҚТЖ басшылығы Шанхайдағы бизнес-форум аясында қытайлық серіктестермен бірқатар екіжақты кездесу өткізді.

"Қазақстан – Қытай: көлік-логистикалық ынтымақтастық және электрондық коммерция – жаңа технологиялар, жаңа мүмкіндіктер" атты бизнес-форум аясында "Қазақстан темір жолы" ҰК" АҚ қытайлық серіктестерімен ІТ-инфрақұрылым, порттық және терминалдық логистика, кеме жасау, көлік үдерістерін цифрландыру және халықаралық көлік дәліздерін дамыту салаларындағы ынтымақтастық туралы бірқатар келісімдерге қол қойды", - делінген хабарламада.

Қол қойылған құжаттардың жалпы сомасы шамамен 400 млн АҚШ долларын құрайды. Келісімшарттардың бір бөлігі юань және теңге валютасында жасалды.

Өткізілген кездесулердің қорытындысы бойынша тараптар стратегиялық көлік-логистикалық ынтымақтастықты кеңейтуге, бірлескен инфрақұрылымдық жобаларды іске асыруға және заманауи цифрлық технологияларды енгізуге өзара мүдделі екендіктерін растады.