Ауғанстан мен Өзбекстан 514,8 млн долларлық келісімдерге қол қойды

Ауғанстан астанасында өткен конференция қорытындысы бойынша тараптар бірқатар келісімдерге келген. 

Ведомствоның хабарлауынша, қол қойылған келісімдер кең ауқымды бағыттарды қамтиды. Атап айтқанда, Ауғанстанда бройлер тауықтарын өндіретін кәсіпорын құру, цемент пен көмір саудасы, бұршақ дақылдары, маш, кептірілген жемістер мен көкөністер экспорттау, сондай-ақ мұнай, битум, мыс және азық-түлік импорттау қарастырылған.

Министрлік мәлімдемесінде Өнеркәсіп және сауда министрі Нұруддин Азизидің сөздері келтірілген. Оның айтуынша, тараптар сегіз түрлі ауған және алты түрлі өзбек өнімдеріне қатысты преференциялық тарифтер бойынша келісімге келген. Өзбекстан тарапы бұл бағыттағы сегіз тарифтік позицияны ресми түрде бекіткен.

Ынтымақтастық пакеті сондай-ақ асфальт саудасын, алкогольсіз сусындар экспортын, спорт саласындағы қызметтерді дамытуды және жұмыртқалайтын тауық өндірісін қамтиды. Бұл тараптардың өзара іс-қимылды дәстүрлі шекаралық саудадан тыс әртараптандыруға ұмтылысын көрсетеді.

Мәліметке сәйкес, екі ел арасындағы ынтымақтастық тұрақты өсім қарқынын көрсетіп отыр. Ақпан айында ауған және өзбек компаниялары 300 млн доллардан астам сомаға 25 келісім жасасқан, бұл экономикалық байланыстардың нығайып келе жатқанын білдіреді.

2021 жылдың тамыз айынан кейін, билікке қайта келгеннен соң, Ауғанстан үкіметі халықаралық серіктестермен, ең алдымен өңір елдерімен сауда-экономикалық және транзиттік ынтымақтастықты кеңейтуге күш салып отыр.

Еске салсақ, 2021 жылдың тамызында «Талибан» қозғалысы билікке келгеннен кейін өзбек-ауған шекарасындағы жағдай күрт шиеленіскен. Ташкент қауіпсіздік шараларын күшейтіп, өз аумағына ауған әскери қызметкерлері мінген ондаған әскери ұшақ пен тікұшақты қабылдаған, сондай-ақ «Термез – Хайратон» өткізу бекетінің жұмысын уақытша тоқтатқан.

Бұған дейін Ауғанстан мен Өзбекстан төрт энергетикалық жоба бойынша 243 млн доллар көлемінде келісімшарттарға қол қойғаны хабарланған еді.

Айта кетейік, Мемлекет басшысы Қасым-Жомарт Тоқаев Ауғанстанға көмек көрсетуді жалғастыру қажет деп есептейді.