Қазақстан метан шығарындыларын азайтуда нәтижеге қол жеткізді Зүлфия Сүлейменова

Оның айтуынша, Қазақстан бұл салада едәуір тәжірибе жинақтап, бірқатар бағытта нақты нәтижеге қол жеткізген.

— Атап айтқанда, метан шығарындыларын азайту бойынша Қазақстан нақты нәтижеге қол жеткізген елдердің бірі. Осы тәжірибені халықаралық деңгейде бөлісуге мүмкіндік бар, — деді Зүлфия Сүлейменова.

Ол саммиттің нақты қорытындысы алдағы күндері жарияланатынын атап өтті. Сонымен бірге, 2023 жылы дайындық кезеңінде екі негізгі мәселе айқындалғанын еске салды. Олар — алаңның өңірлік ынтымақтастыққа ықпалы және экологиялық күн тәртібін ілгерілетуге қосатын үлесі.

Спикердің сөзінше, саммит барысында халықты тікелей алаңдататын мәселелерге басымдық берілген. Атап айтқанда, ауа сапасы, қалдықтарды басқару және су ресурстары талқыланған. Бұл қоғамдағы экологиялық жауапкершілік деңгейінің жоғары екенін көрсетеді.

Сонымен қатар ол жасанды интеллект технологияларының экологияға әсеріне тоқталды. Әсіресе, деректерді өңдеу орталықтарының ресурстарды көп тұтынатынына назар аударды.

— Мұндай орталықтар үлкен көлемде электр энергиясы мен суды қажет етеді. Олардың үздіксіз жұмыс істеуі үшін салқындату жүйелері қолданылады. Бұл су тұтынудың артуына әкеледі, — деді ол.

Осыған байланысты қазір деректер орталықтарының энергия тұтынуын азайту, жаңартылатын энергия көздеріне көшу және су ресурстарын үнемдеу шаралары қарастырылып жатыр.

Оның айтуынша, алдағы уақытта бұл талаптар күшейтіліп, мемлекеттік саясаттың маңызды бағыттарының біріне айналуы мүмкін. Халықаралық деңгейде де түрлі шешімдер талқылануда. Соның бірі — шығарындылары төмен, бірақ су тұтынуы жоғары ядролық энергетика.

— Негізгі мақсат – табиғи ресурстарды тұтынуды азайтып, қоршаған ортаға түсетін жүктемені төмендету, — деп түйіндеді Зүлфия Сүлейменова.

Айта кетейік, бұған дейін Өңірлік экологиялық саммитте метан шығарындыларын азайту мәселесі көтерілгенін жазғанбыз.