Қазақстан QS рейтингінде тарихи нәтижеге қол жеткізді

Бүгін QS Quacquarelli Symonds агенттігінің пәндік рейтингтері жарияланды және Қазақстан соңғы жылдардағы ең мазмұнды серпілістердің бірін көрсетіп отыр, – деп хабарлайды Aikyn.kz сайты.

Бұл жетістіктердің артында тек рейтингтегі орындар ғана емес, сонымен қатар орасан зор еңбек жатыр.

2026 жылы рейтингке еліміздің 13 жоғары оқу орны енді. Бұл – төрт салалық және 27 пәндік бағыт бойынша 70 позиция, ұлттық жоғары білім беру жүйесі үшін абсолюттік рекорд.

Ең бастысы, өзгерістердің сапасы. Атап айтқанда, Абай атындағы Қазақ ұлттық педагогикалық университеті «Білім беру және оқыту» бағыты бойынша әлемде 41-орынға ие болды. Бұл – Орталық Азия жоғары білім беру тарихындағы ең жоғары көрсеткіш. Бұл енді жай ғана қатысу емес, нақты бәсекеге қабілетті деңгей. Біз болашақ экономикасын айқындайтын бағыттар – білім беру, лингвистика, компьютерлік ғылымдар мен инженерия салаларында тұрақты ілгерілеуді көріп отырмыз.

Жаңа өсу нүктелері де қалыптасып келеді. Бірден үш университет пәндік рейтингтерге алғаш рет енді:

Құрманғазы атындағы консерватория – орындаушылық өнер бойынша топ-100 қатарына

Бөкетов атындағы Қарағанды университеті – лингвистика бағыты бойынша

Сейфуллин атындағы агротехникалық университет – ауыл және орман шаруашылығы бойынша.

Бұл жүйенің тек күшейіп қана қоймай, сонымен бірге әртараптанып келе жатқанын білдіреді. Рейтингтердің мақсат емес, көрсеткіш екенін түсіну маңызды. Олар біздің университеттердің жаһандық ғылыми және білім беру кеңістігіне қаншалықты кіріктірілгенін айқындайды. Бүгін біз әлеуетті жинақтау кезеңінен оны нақты жүзеге асыру кезеңіне өткенімізді көріп отырмыз.

Барлық университеттерді, ең алдымен студенттер мен оқытушыларды шын жүректен құттықтаймын! Әрбір нәтиженің артында олардың еңбегі мен биік мақсаттары тұр.

Алдағы міндет – осы көрсеткіштерді арттырып, академиялық жетістіктерді экономика мен технологиядағы нақты өзгерістерге айналдыру.