Атырау облыстық архивінде орын тапшы: жаңа құжаттарды қабылдау қиындаған

Бүгін Атырау облыстық мемлекеттік архивінде дәстүрлі Ашық есік күні өтті. 22 жылдан бері ұйымдастырылып келе жатқан шараға оқушылар мен студенттер қатысып, архив жұмысының қыр-сырымен танысты. Оларға құжаттарды іздеу, сұрау салу тәртібі және қорда қандай тарихи деректер сақталғаны түсіндірілді.

Қазір облыстық архив қорында 400 мыңға жуық құжат сақтаулы. Ең көне ресми құжаттар 1920 жылғы Гурьев уездік комитетінің кезеңінен басталады. Ал 1938 жылы Гурьев облысы құрылғаннан бергі өңір тарихына қатысты мекемелердің құжаттары да осы қорда жинақталған.

Ашық есік күні аясында 1920–2009 жылдар аралығындағы архив құжаттарынан дайындалған көрме ұсынылды. Сондай-ақ келушілер «Сурет тарих» фотоқұжаттар көрмесін тамашалады.

Архивтегі ерекше тарихи деректердің бірі — 1917 жылы түсірілген фотосуреттер. Шетел архивтерінен елге қайтарылған бұл фотоматериалдардың бірінде сол кездегі Приуралье аумағында бақсының қобызбен адам емдеп отырған сәті бейнеленген.

Кездесуде архивтің тұрақты оқырмандарының бірі Сатқали Әуелбеков студенттермен тәжірибесін бөлісті. Ол кәсіби тарихшы болмаса да, туған өлкенің тарихын зерттеуге қызығатынын және осы мақсатта архивке келіп, түрлі тарихи деректер мен құжаттарды зерттеп жүргенін айтты. Оның сөзінше, тарих нақты құжат пен дәйекке сүйенуі керек. Өйткені дәлел мен дерекке негізделмеген мәліметті тарих деп қабылдау қиын.

Бүгінде архивтің өзекті мәселелерінің бірі — құжат сақтайтын орынның тапшылығы. Қойманың толуына байланысты мекемелерден жаңа құжаттарды қабылдау тоқтап тұр.

Бұл мәселе тек архив жұмысына қатысты емес. Мекемелер құжаттарын белгіленген тәртіппен және уақытында өткізбесе немесе белгілі бір жылдардағы деректер толық болмай қалса, кейін азаматтардың еңбек өтілін растау кезінде қиындық тууы мүмкін. Әсіресе зейнетақы рәсімдеген кезде архивтік анықтама қажет болған жағдайда, тиісті құжаттардың табылмауы азаматтарға қосымша кедергі келтіреді.

Осылайша, 400 мыңға жуық құжат сақталған облыстық архив үшін тарихи мұраны жинақтаумен қатар, оны сақтайтын жеткілікті орын мәселесі де өзекті болып отыр.

Айнұр САПАРОВА
Сурет пен видеоны түсірген автор

Кеше, 12:28