Қазақстан Орталық Азияның жабайы табиғатын сақтау саласындағы ынтымақтастықты нығайтуда

2025 жылы 22 қазанда Қазақстан Республикасының Экология және табиғи ресурстар министрлігі Орман шаруашылығы және жануарлар дүниесі комитетінің төрағасы Данияр Тұрғамбаев Бішкек қаласында өткен «Орталық Азия тауларындағы жабайы табиғат пен қауымдастықтардың тұрақтылығын арттыру – CAMCA (Central Asian Mammals and Climate Adaptation) жобасының нәтижелері мен ауқымын кеңейту» атты халықаралық конференцияға қатысты.

 Жоба Біріккен Ұлттар Ұйымының Қоршаған орта жөніндегі бағдарламасы (ЮНЕП) мен Жабайы жануарлардың қоныс аударатын түрлерін сақтау туралы Конвенция (CMS) хатшылығы арқылы Халықаралық климаттық бастама (IKI) қаржылай қолдауымен іске асырылды.
 

Өз сөзінде Данияр Тұрғамбаев Орман шаруашылығы және жануарлар дүниесі комитеті өңірлік басқармалармен және қоғамдық ұйымдармен бірлесіп, климатқа төзімді жабайы табиғатты басқару бағытында жұмыс жүргізіп жатқанын атап өтті. Ерекше назар экологиялық ағартуға, экотуризмді дамытуға, ауыл тұрғындары үшін баламалы табыс көздерін құруға және жастарды табиғатты қорғау бастамаларына тартуға аударылуда.
 

Қазақстан экологиялық дәліздер құру идеясын ұлттық әрі халықаралық деңгейде белсенді түрде ілгерілетіп отырғанын атап өтті. Киік пен қар барысы сияқты сирек және миграциялық түрлерді сақтау мақсатында көршілес елдермен тығыз ынтымақтастық орнатылған. «Бұл жануарлар мемлекеттік шекараларды білмейді, сондықтан оларды сақтау тек мемлекет, ғылым, бизнес және азаматтық қоғам күштерін біріктіру арқылы ғана мүмкін», — деді.

 Конференцияда өңірлік өзара іс-қимылдың негізгі бағыттары талқыланды:
 биологиялық әртүрлілікті климатқа төзімді сақтау құралы ретінде экологиялық дәліздер құру;
 таулы қауымдастықтар мен жабайы табиғаттың тұрақтылығын арттыру;
 Орталық Азия елдері арасындағы трансшекаралық ынтымақтастықты дамыту.
 

Конференция қатысушылары табиғатты қорғауда климатқа бағытталған тәсілдерді дамытуға, қауымдастықтарды климаттың өзгеруіне бейімдеуге және табиғи ресурстарды тұрақты басқаруға бірлесе қолдау көрсетті.

Бүгін, 18:00