Қазақстан шегірткемен күресте жасанды интеллектті қолданбақ

Қазақстан ауыл шаруашылығында цифрлық технологияларды енгізуді күшейтіп, шегірткеге қарсы күресте жасанды интеллект мүмкіндіктерін пайдалануды жоспарлап отыр.
Бұл бағыттағы жұмыстар БҰҰ Азық-түлік және ауыл шаруашылығы ұйымымен бірлесіп жүзеге асуда.

Қазақстан Республикасы Ауыл шаруашылығы министрлігі мәліметінше, жаңа тәсілдер шегірткелердің таралуын ерте анықтап, жедел әрекет етуге мүмкіндік береді. Жоба аясында дрондар, цифрлық мониторинг жүйелері және жасанды интеллект алгоритмдері қолданылмақ.

Ынтымақтастық тек зиянкестермен күреспен шектелмейді. Тараптар мал және балық шаруашылығын дамыту, ветеринарлық қауіпсіздікті күшейту, сондай-ақ жер және су ресурстарын тиімді басқару бағыттарында да бірлескен жобаларды іске асыруда.

Қазіргі таңда жалпы құны 9,5 млн доллар болатын 10 негізгі жоба жүзеге асырылып жатыр. Оның ішінде тұқым шаруашылығы, сүт өндірісі және аграрлық секторды технологиялық жаңғыртуға басымдық берілген.

Сонымен қатар «Қазақстандық сұрыптар мен тұқымдар» ұлттық бастамасы аясында Ақмола облысы, Алматы облысы, Қостанай облысы және Солтүстік Қазақстан облысы аумақтарында деректер жинау жұмыстары аяқталған.

Ауыл шаруашылығы министрі Айдарбек Сапаров бұл бастамалар агроөнеркәсіп кешенін жаңғыртуға және халықаралық стандарттарға сай дамытуға серпін беретінін атап өтті.