Қазақстан терең саяси сенім қалыптастыру бағытында жұмыс істеп жатыр Таиланд сарапшысы

Сарапшының айтуынша, бұл өзгерістер мемлекеттік институттарды заманауи үлгіге келтіруге, ашықтықты нығайтуға және биліктің халық үніне жедел түрде құлақ түруіне деген шынайы ниетін көрсетеді.

— Қазақстан саяси тұрақтылықты сақтай отырып, мемлекеттік жүйені біртіндеп ашық етудің арасындағы алтын теңгерімді табуға ұмтылып отыр. Бұл — тұрақты дамуды көздейтін көптеген посткеңестік ел үшін үлкен сынақ әрі маңызды қадам, — деп атап өтті ол.

Сонымен қатар, тайлық маманның айтуынша, бұл жаңғыртулардың жай ғана заңдық түзетулер емес. Аталған өзгерістерді мемлекет пен қоғам арасындағы қарым-қатынасты жаңаша зерттеу, биліктің есеп беру жауапкершілігін арттыру және азаматтардың ел ісіне араласуына жол ашу деп түсіндіреді.

— Мемлекеттік институттардың рөлін күшейтіп, азаматтардың мемлекеттік саясатқа ықпал ету тетіктерін жетілдіру арқылы Қазақстан терең саяси сенім қалыптастырып жатыр. Уақыт өте келе, дәл осы сенім мемлекет тұрақтылығының ең берік іргетасына айналады, — деп толықтырды сарапшы.

Оның пікірінше, реформалардың тағы бір маңызды сипаты — оның жүйелі әрі конституциялық шеңберде жүруі. Қазақстан төңкерістер мен күрт өзгерістерге бой алдырмай, құқықтық негізде реформалар жолын таңдады. Мұндай қадам мемлекеттік жүйенің сабақтастығын бұзбай, саяси дүрбелеңдердің алдын алып, басқару ісінің тұрақты дамуын қамтамасыз етеді.

— Реформалардың жалпы бағытында алдағы референдумның орны бөлек. Референдум тек құқықтық түзетулерді бекіту құралы емес, сондай-ақ азаматтардың елдің саяси бағытын айқындауға тікелей қатысуына мүмкіндік беретін демократиялық процесс ретінде жүзеге асады. Егер референдум ашық әрі әділ өтсе, ол реформалардың легитимділігін арттырып, халықтың үміті мен мемлекеттік өзгерістерді бір арнаға тоғыстырады, — деді Арифин Яма.

Спикер атап өткендей, бұл бастамалар Қазақстанның Орталық Азиядағы орнықтылықтың ұйытқысы екенін тағы да дәлелдей түседі.

— Еуразия геосаясатында, әсіресе экономикалық қарым-қатынас пен көлік-логистика саласында бұл өңірдің салмағы артып келеді. Осылайша ішкі ынтымақтастығы бекем, саяси жүйесі тұрақты Қазақстан бүкіл аймақтың өркендеуіне зор ықпал ете алады, — деді ол.

Сарапшының пайымдауынша, Қазақстандағы реформалар алыс-жақын елдерге, соның ішінде Тайландқа да тың мүмкіндіктер сыйлайды. Сенімді әрі ашық мемлекеттік жүйе сауда, білім, туризм және ғылым саласындағы серіктестігінің берік тірегіне айналмақ. Орталық Азияның өзге аймақтармен интеграциясы күшейген сайын, Оңтүстік-Шығыс және Орталық Азия арасындағы байланыстар да жаңа деңгейге көтеріледі.

Осы орайда сарапшы Қазақстандағы өзгерістерді тек ішкі саяси үрдіс деп қабылдамау керек деп есептейді. Ертеңіне сеніммен қарайтын, іргесі мықты Қазақстан тек өз халқы үшін ғана емес, жаһандық деңгейдегі келіссөздер үшін де маңызды серіктес болмақ.

— Бүгінгі реформалар Қазақстанның тұрақтылықты сақтай отырып, есеп беретін ашық билік құруға және халықаралық белсенділікті арттыруға деген шынайы ұмтылысын аңғартады. Егер бұл өзгерістер жүйелі әрі халықтың қатысуымен жүзеге асса, олар қоғамдағы сенімді бекітіп, Қазақстанның әлемдік мәртебесін биіктетеді. Сонымен қатар, аймақаралық ынтымақтастықтың жаңа көкжиектерін ашады, — деп түйіндеді сарапшы.

Айта кетейік, бұған дейін грузиялық сарапшы қазіргі таңда еліміз дамудың маңызды белесінен өтіп жатқанын айтқан еді.