Қазақстан Жапонияға мұнай жеткізуші болуы мүмкін

Жапония үкіметі Таяу Шығыстағы жағдайдың шиеленісуіне байланысты Қазақстаннан мұнай импорттау мүмкіндігін қарастыруда. Бұл туралы Kyodo агенттігі хабарлады.

Агенттіктің мәліметінше, бұл қадам Токионың энергия ресурстары жеткізілімін әртараптандыру стратегиясы аясында талқыланып жатыр. Қазіргі таңда Жапония мұнайдың шамамен 90 пайызын Таяу Шығыстан алады, бұл елді аймақтағы геосаяси тәуекелдерге аса тәуелді етеді.

Бұған дейін жапон тарапы АҚШ-тан Аляска мұнайын жеткізу мүмкіндігін де қарастырған болатын. Осы жағдайда Қазақстан әлеуетті балама жеткізушілердің бірі ретінде аталып отыр.

Өткен жылдың желтоқсанында Қазақстан Президенті Қасым-Жомарт Тоқаевтың Жапонияға сапары барысында 3,7 млрд доллардан асатын 60-тан астам екіжақты құжатқа қол қойылған еді. Мемлекет басшысы Жапонияның жоғары технологиялық деңгейін атап өтіп, екі ел арасындағы ынтымақтастықтың зор әлеуетін ерекше көрсеткен. 

Сондай-ақ Қазақстан бірлескен жобаларды жүзеге асыруға және жапон инвестицияларын тартуға қолайлы жағдай жасайтынын мәлімдеген.

Бүгін, 17:09