Қазақстанда 1 қыркүйектен бастап сұр көліктерге қарсы жаңа шаралар жарияланды

Премьер-министр Олжас Бектенов 10 күн ішінде Қазақстанға автокөліктерді заңсыз әкелуге қарсы іс-қимыл жөніндегі шаралар кешенін әзірлеуді тапсырды, - деп хабарлайды Tengrinews.kz тілшісі.

Жалғасы

■

Үкіметке қандай көлікпен келдіңіздер? Спикерлерге күтпеген сұрақ қойылды Бүгін 15:07

Айта кетейік, бұған дейін Қазақстанда автокөліктерді бейресми арналар арқылы әкелу кезіндегі алаяқтық жағдайлар жиілеп кеткені туралы Үкімет отырысында Қазақстан автокөлік одағының президенті Анар Мақашева мәлімдеген болатын. Оның айтуынша, елге өзге мемлекеттерде кепілде тұрған, ұрланған деп есептелетін немесе басқа да құқықтық мәселелері бар көліктер келініп жатыр. Сонымен қатар, сатып алушыларда мұндай машиналардың тарихын алдын ала тексеру мүмкіндігі бола бермейді.

Үкімет басшысының айтуынша, заңсыз әкелінген автокөліктер көбінесе техникалық және экологиялық талаптарға сай келмейді. Ол кеден заңнамасының нормаларын қолданудағы олқылықтарды осының бір себебі ретінде атап өтті.

"Қаржы министрлігі Өнеркәсіп министрлігімен бірге, он күн ішінде автокөліктердің ел аумағына заңсыз әкелінуіне жол бермеу жөніндегі шаралар кешенін әзірлесін", - деп мәлімдеді Олжас Бектенов үкімет отырысында.

Ол кедендік әкімшілендіру мен техникалық реттеудегі жаңа тәсілдер 2026 жылдың 1 қыркүйегінен бастап енгізілуі тиіс екенін баса айтты.

Сонымен қатар премьер қабылданып жатқан барлық шара бойынша халық арасында түсіндіру жұмыстарын жүргізуді тапсырды.

Автокөліктердің "сұр" импортымен күрес тақырыбы Қазақстанда бірнеше жылдан бері талқыланып келеді. Бұған дейін Өнеркәсіп министрлігі жекелеген компаниялар автокөліктерді жаппай әкелу үшін жеке тұлғаларды пайдаланатынын мәлімдеген болатын. Бұл заңды тұлғаларға қойылатын талаптарды айналып өту мақсатында жасалады. Соның салдарынан мемлекет бюджетіне кедендік төлемдер толық түспейді, ал нарыққа заңбұзушылықтармен рәсімделген көліктер шығады.

Шілдеде Мемлекеттік кірістер комитеті де желіде тараған автокөлік әкелу алымдары өскені туралы ақпаратты теріске шығарып, қолданыстағы кедендік баждардың өзгермегенін атап өтті.

Сонымен қатар ведомство жеке пайдалану үшін автокөлік әкелу кезінде шектеу сақталатынын — жылына бір адамға бір көліктен артық емес екенін және ресімдеу кеден заңнамасының талаптарына сәйкес жүргізілуі тиіс екенін еске салды.

Google News арқылы жаңалықтарымызды қадағалаңыз