Қазақстанда апта ішінде болған кадрлық тағайындаулар

Аптаның алғашқы күні Асет Исенали Корея Республикасындағы, ал Марғұлан Баймұхан Мьянма Одағы Республикасындағы елші қызметіне тағайындалды. 

Ал Нұрғали Арыстанов Президент Жарлығымен Қазақстан Республикасының Корея Республикасындағы Төтенше және Өкілетті елшісі лауазымынан босатылды.

Дүйсенбіде Жамбыл облысы әкімінің өкіміне сәйкес Нұрсұлтан Исабеков Жамбыл облысы әкімдігінің Энергетика және тұрғын үй-коммуналдық шаруашылық басқармасының басшысы болып тағайындалды. 

Нұрсұлтан Арқабайұлы 1990 жылы Жамбыл облысы Жамбыл ауданында дүниеге келген.

2009 жылы Қазақ бас сәулет-құрылыс академиясы жанындағы Құрылыс және дизайн колледжін, 2013 жылы Л.Б.Гончаров атындағы Қазақ автомобиль-жол академиясын, 2021 жылы академик Ә.Қуатбеков атындағы Халықтар достығы университетін бітірген.

Еңбек жолын 2011 жылы «ГАПП» ЖШС-ның техник-жобалаушысы болып бастаған.

2012-2015 жылдары «Табыс-Жоба» ЖШС-ның бас инженері, 2015-2021 жылдары Тараз қаласы әкімдігінің сәулет және қала құрылысы бөлімінің технигі, 2021-2023 жылдары Тараз қаласы әкімдігінің сәулет және қала құрылысы бөлімінің жоспарлау және қала аумағын соғу секторының бас маманы, 2023-2024 жылдары Тараз қаласы әкімдігінің құрылыс бөлімінің басшысы лауазымдарында еңбек етті.

2024 жылдың қазан айынан бастап бүгінгі күнге дейін Тараз қаласы әкімінің орынбасары болып қызмет атқарды.

13 сәуір күні Шымкент қаласы әкімінің өкімімен Шымкент қалалық орта сапасы және бақылау басқармасына жаңа басшы тағайындалды. Енді бұл қызметті Берік Дүйсенов атқарады. 

Б.Дүйсенов 1978 жылы 7 қыркүйекте бұрынғы ОҚО Арыс қаласында туған.

Білімі жоғары. Қ.А.Ясауи атындағы Халықаралық қазақ-түрік университетін, Академиялық инновациялық университетін және М.Әуезов атындағы Оңтүстік Қазақстан мемлекеттік университетін бітірген. Мамандығы бойынша біліктілігі – құқықтану, мемлекеттік және жергілікті басқару, құрылыс.

Ол еңбек жолын 2000 жылы Ақтөбе қалалық прокуратурасы бөлімінің прокуроры болып бастаған.

2004-2016 жылдары «Кит Со», «Отау Строй», «Корпорация Бастау» ЖШС-нің заңгері, Түркістан қаласы әкімі аппаратының заң бөлімінің меңгерушісі, Түркістан, Шымкент қалалары әкімі аппараттарының басшысы, «Сәулет-Бетон» ЖШС бас директоры қызметтерін атқарған.

2016-2017 жылдары ОҚО Мемлекеттік сәулет-құрылыс бақылауы басқармасы басшысының орынбасары, 2017 жылы ОҚО Мемлекеттік сатып алу басқармасының басшысы, 2017-2020 жылдары Шымкент қаласы Мемлекеттік сәулет-құрылыс бақылауы басқармасы басшысының орынбасары, басшысы, сондай-ақ 2020 жылы «Саулет-Бетон» ЖШС директорының кеңесшісі, 2020-2025 жылдары ҚР Көлік министрлігі Автомобиль көлігі және көліктік бақылау комитеті Шымкент қаласы бойынша көліктік бақылау инспекциясының басшысы болған.

2025 жылдың мамыр айынан бүгінге дейін «Аялдама Қызмет» ЖШС директорының кеңесшісі қызметін атқарып келді.

Аптаның үшінші күні Нұрлан Кәрібаев «Батыс» өңірлік қолбасшылығы әскерлерінің қолбасшысы атанды. 

Ол 1978 жылы 13 қыркүйекте Қызылорда қаласында дүниеге келген.

Қазақстан Республикасы Қарулы Күштерінің Әскери академиясын «мотоатқыштар әскерлерін басқару тактикасы» мамандығы бойынша, Қазақстан Республикасы Ұлттық қорғаныс университетін «әскери және әкімшілік басқару» бағыты бойынша, сондай-ақ Ресей Федерациясы Қарулы Күштері Бас штабының Әскери академиясын тәмамдаған.

Қазақстан Республикасы Қарулы Күштерінде мотоатқыш взводының командирінен бастап, әртүрлі гарнизондардағы әскери бөлімдердің командиріне дейін түрлі лауазымдарда қызмет атқарған.

Жаңа лауазымға дейін ол «Оңтүстік» өңірлік қолбасшылығы әскерлері қолбасшысының бірінші орынбасары — штаб бастығы қызметін атқарды.

«Жауынгерлік ерлігі үшін» медалімен және II дәрежелі «Айбын» орденімен марапатталған.

Дәл осы күні Ұлытау облысының денсаулық сақтау жүйесіне жаңа басшы тағайындалды. Бұл қызметке көпжылдық тәжірибесі бар хирург Рүстем Нысамбаев келді. 

Оның еңбек жолы Жезқазған мен Сәтбаев қалаларындағы жетекші медициналық мекемелермен байланысты, сондай-ақ басқарушылық тәжірибесі де бар.

Рүстем Серікұлы Қарағанды мемлекеттік медицина академиясының түлегі. Еңбек жолын 2008 жылы Сәтбаев қаласының медициналық-санитарлық бөлімінде бастаған.

2013-2016 жылдары Жезқазған қаласындағы «Қазақмыс» медициналық орталығында қызмет атқарды.

Одан кейін 2016 жылдан 2025 жылға дейін Жезқазған қаласының облыстық көпсалалы ауруханасында бірқатар жауапты қызметтерді атқарды, жарақат бөлімін басқарды және хирургиялық қызметке жетекшілік етті.

2025 жылдан бастап жаңа тағайындауға дейін Сәтбаев қаласының ауруханасын басқарған.

Мемлекеттік еңбек инспекциясы комитеті Ұлытау облысы бойынша департаментінің басшысы болып Мерхат Сапарғалиев тағайындалды. 

Мерхат Балтыбекұлы Батыс Қазақстан инженерлік-технологиялық университетінің түлегі.

Еңбек жолын 2004 жылы Батыс Қазақстан облысы Ақжайық ауданы әкімдігінде бастаған.

2010-2011 жылдары Орал қалалық мәслихаты аппаратының жетекші маманы қызметін атқарған.

2012-2013 жылдары Батыс Қазақстан облысы Қаржылық бақылау инспекциясында бас инспектор-ревизор болып жұмыс істеді.

2014 жылдан 2023 жылға дейін өңірдің жұмыспен қамтуды үйлестіру және әлеуметтік бағдарламалар басқармасында түрлі лауазымдарды атқарды.

2023-2025 жылдары Батыс Қазақстан облысы бойынша Мемлекеттік еңбек инспекциясы комитеті департаментінде бас маман және бөлім басшысы қызметтерін атқарды.

2025 жылдан бастап жаңа тағайындауға дейін ҚР Еңбек және халықты әлеуметтік қорғау министрлігінің Мемлекеттік еңбек инспекциясы комитетінде бас сарапшы лауазымында жұмыс істеген.

Бейсенбіде Қазақстан Республикасы Бас прокурорының бұйрығымен Болат Жұмағалиев Орал қаласының прокуроры лауазымына тағайындалды. 

БҚО прокуратурасының баспасөз қызметінен мәлім еткеніндей, Болат Әлібекұлы прокуратура органдарындағы қызметін 2011 жылы Алматы қаласында аудан прокурорының көмекшісі лауазымынан бастады.

Сондай-ақ аудан прокурорының аға көмекшісі, бөлім аға прокуроры, Алматы қаласы прокуратурасының басқарма аға прокуроры, Бас прокуратураның қоғамдық мүдделерді қорғау қызметінің аға прокуроры, Бас прокурордың көмекшісі қызметтерін атқарды.

2023 жылдан бастап Түркістан облысы прокуратурасының қоғамдық мүдделерді қорғау басқармасының бастығы қызметін атқарып келді.

Прокуратура органдарындағы жалпы еңбек өтілі — 14 жыл.

Осыған дейін Орал қаласының прокуроры болған Мейірхан Ізімов басқа қызметке ауысты.

16 сәуір күні «Kazakh Tourism» Ұлттық компаниясы» АҚ Басқарма төрағасының орынбасары болып Едіге Дүйсенұлы Әділханов  тағайындалды 

Баспасөз қызметінің мәліметтеріне қарағанда, бұған дейін ол «Астана» халықаралық қаржы орталығының креативті индустриялар департаментінің директоры қызметін атқарған. Туризм және қонақжайлылық саласында мол тәжірибесі бар, оның ішінде халықаралық қонақүй брендтерінде, «Kazakh Tourism» ҰК» АҚ құрылымында, сондай-ақ Қазақстан Республикасы Спорт істері агенттігінде қызмет еткен.

Л.Н. Гумилев атындағы ЕҰУ-ды тәмамдаған, магистр дәрежесін туризм мен қонақжайлылық бағытындағы әлемдегі жетекші жоғары оқу орындарының бірі — César Ritz University-де (Швейцария) оқыған.

Күні кеше ҚР Президенті  жанындағы Мемлекеттік басқару академиясының түлегі, өңірлік кадрлық резервтің мүшесі Хамза Оралбекұлы Оразбеков  Павлодар облысы ауыл шаруашылығы басқармасының басшысы болып тағайындалды. 

Хамза Оразбеков 1988 жылы туған. Еңбек жолын 2007 жылы бастап, Павлодар облысы Павлодар ауданындағы ауыл шаруашылығы және кәсіпкерлік бөлімінде жауапты қызметтер атқарған. Кейінгі жылдары Заңғар ауылдық округінің әкімі, Павлодар ауданы кәсіпкерлік және ауыл шаруашылығы бөлімінің басшысының орынбасары, Павлодар қаласы ауыл шаруашылығы, кәсіпкерлік және ветеринария бөлімінің басшысының орынбасары, Павлодар ауданы жер қатынастары бөлімінің басшысы, Павлодар ауданы әкімінің орынбасары қызметтерінде болған.

Ол ҚР Президенті жанындағы Мемлекеттік басқару академиясының түлегі, өңірлік кадрлық резервтің мүшесі.

Өткен аптадағы кадрлық тағайындауларды білгіңіз келсе, мына сілтемеге өтіңіз.